Duke folur në mbledhjen e Këshillit të Legjislacionit, deputeti Oerd Bylykbashi tha se “lidhja krim-politikë, interesa kriminale-interesa politike, janë rreziku kryesor për demokracinë dhe stabilitetin e Shqipërisë”.
Sipas deputetit demokrat, kjo lidhje ekziston në forma dhe kanale të ndryshme, që nga mbështetja politike për krimin, tek aksesi në institucionet shtetërore, tek favorizimi i bizneseve apo personave me lidhje kriminale në ekonomi.
“Vetingu i politikanëve duhet bërë shpejt. Nëse ne nuk pastrojmë këtë lidhje të krimit me politikën nuk do të ketë as zgjedhje, as demokraci, nuk mund të ketë as parlament dhe as ekonomi” u shpreh deputeti demokrat Oerd Bylykbashi në mbledhjen e Këshillit të Legjislacionit.
Bylykbashi, i cili ishte përfaqësues i vetëm i Partisë Demokratike në Këshillin e Legjislacionit, deklaroi:
“I gjithë procesi në këtë komision ka pikërisht këtë qëllim. Të vonojë, shtyjë dhe hedhë poshtë vetting-un e politikanëve. Shqiptarët e mbështesin vetting-un e politikanëve. Edi Rama ka deklaruar publikisht se është kundër. Ju po bëni dhe do të bëni gjithçka për ta zvarritur, por nuk do ta ndalni dot vetting-un e politikanëve. Siç nuk ndalët dot dekriminalizimin. Ne jemi të vendosur dhe do të bëjmë gjithçka për ta zbatuar. Në këtë vend nuk do të ketë as zgjedhje, as demokraci, as parlament, as drejtësi, as ekonomi, pa ndarë politikën nga krimi”.
a.ç
