Ilirjan Celibashi, kreu i Komisionit Qendror të Zgjedhjeve, i ka kthyer përgjigje Partisë Demokratike, lidhur me kërkesën e kësaj të fundit për një hetim administrativ për përmbajtjen e fletëve të votimit në të gjitha kutitë në mbarë vendin.
Në përgjigjen e Celibashit, sqarohet se 1,935,328 fletë votimi, janë të papërdorura për shkak të procesverbaleve të shënuara nga qendrat e votimit në vend.
Kështu, 27,340 fletë votimi nuk u përdorën në Bashkinë Vorë dhe Njësinë Administrative nr. 10 në Tiranë, për shkak të votimit elektronik. 99,455 fletë votimi nuk u përdorën pasi në procesverbalet u shënua gabimisht me “0” numri i fletëve të papërdorura. Sakaq, 5.369 fletë votimi, nuk janë përdorur pasi pasqyrohet të jenë me gabim në procesverbalet përkatëse, duke sqaruar se janë 1380 qendra votimi që kanë raportuar këto gabime.
“I nderuar Z. Nuri,
Në përgjigje të kërkesës tuaj lidhur me verifikim të menjëhershëm të fletëve të votimit të përdorura për zgjedhjet e datës 11 Maj 2025, ju informojmë se :
Numri prej 1,935,328 fletë votimi të papërdorura përfshin vetëm sasinë e raportuar të këtyre fletëve sipas procesverbaleve të çdo QV-je.
Këtij numri i duhen shtuar edhe:
a. 27,340 fletët e votimit për 74 QV, ku ështe aplikuar votimi elektronik, ZAZ Nr.27 (Bashkia Vorë) dhe ZAZ Nr. 41 (Njësia Administrative 10, Tiranë). Sikurse mund të kuptohet edhe këto fletë votimi nuk janë përdorur;
b. 99,455 fletë votimi të papërdorura që përbëjnë sasinë e këtyre fletëve për 233 QV, në procesverbalet e të cilave gabimisht është shënuar me “0” numri i fletëve të papërdorura;
c. 5,369 janë fletë votimi të papërdorura por që numrat e tyre në test llogjik vlerësohet se janë pasqyruar me gabime në procesverbalet përkatëse për çdo QV (janë 1,380 QV që kanë raportuar këto të dhëna me gabime).
Duke ju falenderuar për bashkëpunimin,
Komisioneri Shtetëror i Zgjedhjeve, Ilirjan Celibashi”, shkruhet në përgjigjen e KQZ-së për PD-në.
Partia Demoratike, më herët gjatë ditës së sotme, ngriti shqetësimin e mungesës së 130 mijë fletëve të votimit nga zgjedhjet e 11 majit, pasi u shpreh se nuk përputhet numri i numri i fletëve të votimit të prodhuara me votat e gjetura në kuti.
E ndërsa demokratët nuk pranojnë rezultatet e zgjedhjeve të 11 majit, kanë kërkuar përsëritjen e tyre, pas pretendimeve për manipulim nga partia në qeverisje. Në zgjedhjet parlamentare të 11 majit, Partia Demokratike dhe koalicioni “Shqipëria Madhështore” i udhëhequr prej saj, morën 50 mandate deputetësh.
