Nga Artur Ajazi
Nuk po them se, para 2 apo 3 dekadash Partia Demokratike bënte “politikën e madhe”. Nuk po them gjithashtu se, para 2 apo 3 dekadash, ajo ishte parti që prodhonte politikë. Jo, ajo gjithmonë ka prodhuar sherre, debate ekstreme pa asnjë lidhje me realitetin, ka prodhuar pengesa të vazhdueshme të jetës parlamentare, dhe ka penguar sistematikisht rrugëtimin drejt një demokracie funksionale në Shqiperi. Dikur i sulej Fatos Nanos, dhe ç’nuk kemi dëgjuar për atë si kryeminister, ministrat, deputetët e tij, etj. Tani ka 13 vite që i sulet Ramës, ministrave, deputeteve, elektoratit majtist, ndërkombetareve, i sulet policëve, ushtarakeve, dhe kujdo që voton dhe përkrah të majtën.
Partia Demokratike e nisi me Sali Berishën, vazhdon me Sali Berishën, dhe do ta mbyllë jetën e asaj force politike me Sali Berishën. Kjo është e padiskutueshme. Pas Berishës, nuk do të ketë kurrë një kryetar dhe politikan të aftë, që të shpjerë përpara atë parti të plakur dhe të vyshkur. Kanë 2 vjet që merren me kryeministrin, kanë 2 vite që merren me Arben Ahmetajn (të cilin e kanë sot mik partie) kanë 3 vjet që merren me SPAK-un GJKKO, me drejtesinë, dhe kanë 2 muaj që i janë sulur egërsisht Belinda Ballukut. Nuk mbroj asnjë deputet dhe asnjë minister. Por në rast se, Belinda ka shkelur ligjet, ka abuzuar me taksat tona, le të merret drejtësia me problemet e saj. Por komikja dhe dramatikja mbetet partia e Berishës.
Edhe pse janë “ku thërret Qameti” si force politike, ata ngulin këmbën e tyre se “Belindës duhet ti hiqet mandati, duhet të shkojë në burg” apo dhe se “Rama duhet të ikë nga posti kryeministrit, duam qeveri teknike”. E dini çfarë duan ata ? Thjesht të shtyjnë ditët, javët, muajt dhe 4 vjeçarin, me veprime dhe sjellje të tilla, që në zgjedhjet e reja lokale apo të përgjithshme, të justifikojnë humbjen e re. Pra, PD ka humbur krejtësisht sensin e jetës politike. Ata sot nuk kanë elektorat të besueshëm, nuk kanë mbështetës të besueshëm, ndersa anëtarësia e tyre sa vjen dhe firon. Dhe në këto kushte, të merresh me “imunitetin e Ballukut dhe qeverinë teknike”, do të thotë se, partinë e ke lënë me kohë në “rënie të lirë”. Berisha nuk ka më interes tek mbijetesa e PD. Kjo për 1001 arsye, si mosha e tij, pamundësia e rivendosjes së marrëdhënieve të mira me faktorin nderkombetar, pamundësia e thithjes së të rinjve në PD, apo dhe njolla e viteve të shkuara, që nuk u hiqet akoma atyre që sot drejtojnë atë parti.
Dhe përballë kësaj dyzine me probleme që pengojnë ecurinë elektorale të asaj partie, Berisha dhe shpura e tij, gjejnë kohën dhe merren me punët e SPAK. Medemek, i dalin në “mbrojtje SPAK-ut”, kur ajo strukturë nuk ka nevojë fare, për mbrojtjen e tyre. Duket sikur PD, ka rënë si gjithmonë, në kurthin e Ramës, ndryshe nuk ka mundësi që Berisha e ka kthyer partinë në “celulë prokurorësh”.
