Grupi parlamentar i PD-së pritet të mblidhet sot në mesditë për të marrë një vendim nëse bojkoti I komsioneve parlamentare do të mbetet vetëm në këtë pikë, apo do të shtrihet edhe me një bojkot të mundshëm të Kuvendit me një afat të pacaktuar. Mbledhja e grupit mësohet se do të zhvillohet me dyer të mbyllura. Në këtë mbledhje pritet të diskutohen të gjitha hapat që do të hedhë PD-ja në raport me Kuvendin, dhe nuk përjashtohet mundësia që të ndërmerret edhe një vendim për bojkot të plotë të Kuvendit, duke vënë si kusht largimin nga parlamenti të deputetit, Armando Prenga. Javanews mëson se janë disa alternative që do të diskutohen, por nuk përjashtohet mundësia që të ekstremizohet vendimi për bojkot, duke mos u ndalur vetëm në punën në komisionet parlamentare. Bojkoti i papritur sot nga ana e opozitës i prezencës në komisionet parlamentare, ka bërë që shumica e këtyre komisioneve të mos nisin dot nga puna për shkak se nuk është bërë korumi i duhur që duhet për nisjen e punës në këto komisione. Komisionet të cilat mbetën pa nisur nga puna janë ai Medias, Sigurisë Kombëtare, i Ligjeve, Shëndetësis etj.
Debatet
A po shkon PD-ja drejt bojkotit të Kuvendit? Ky mësohet se është një ndër skenarët që po diskutohet më shumë nga ana e krerëve më të lartë të kësaj force politike. Burime brenda PD-së bëjnë të ditur për Javaneës se në krye të kësaj nisme janë vënë përfaqësuesit e vijës së ashpër në PD me në krye ish- kryeministrin, Sali Berisha. Rikthimi në Kuvend i deputetit, Armando Prenga, por edhe pretendimet sipas tyre se nuk po ka shenja nga ana e qeverisë për zbatimin e ligjit për “Dekriminalzimin”, janë ngritur si arësye për ndërmarrjen e këtij vendimi ekstrem për të bojkotuar Kuvendin. Sinjalet e para për këtë u dhanë sot kur përfaqësues të PD-së në komisonet parlamentare bojkotuan punën në këto komisone, duke ngritur si argument çështjen “Prenga”. Deputetët e linjës së ashpër në PD vlerësojnë se përderisa mazhoranca po ecën në kundërshtim me atë që është dakordësuar për dekriminalizmin, shprehur kjo edhe në ligjin e miratuar pak kohë më parë, duhen bërë gjeste të forta, të cilat shprehin qartazi mospranimin nga ana e PD-së të kësaj situate. Sipas tyre, bojkoti duhet të zgjasë derisa qeveria të reflektojë e të largojë nga Kuvendi deputetin Prenga, si dhe të nis zbatimin e ligjit për “Dekriminalizimin”.
“Dritë hijet” e bojkotit
Por a është debati për bojkotin e Kuvendit, lidhur ngushtësisht me këto argumenta? Këtu nisin edhe pikëpyetjet rreth këtij debati që po zhvillohet brenda PD-së. Vlerësues politik mendojnë se Prenga dhe çështja e zbatimit të ligjit për “Dekriminalizimin” mësë shumti mund të përdoren si pretekst që PD-ja të mos jetë në Kuvend gjatë muajit mars, kohë në të cilën gjërësisht mendohet se është lënë që të kalohet në Kuvend drafti për ndryshimet kushtetuese në projektligjin për Reformën e Drejtësis. Ky ishte një zotim i ndërmarrë nga Kryeministri Edi Rama edhe gjatë vizitës që Sekretari i Shtetit, John Kerry, zhvilloi disa ditë më parë në Shqipëri. Duket se rasti “Prenga” apo çështja e zbatimit të ligjit për “Dekriminalizimin” më shumë tingëllojnë si “sebepe”, pasi pavarësisht opinioneve që ndan gjithësecili, rasti “Prenga” ka të bëjë me një vendim të Gjykatës së Lartë. Ndërsa lidhur me “Dekriminalizimin”, fuqitë ligjore të tij hynë në muajin mars. Ndaj çdo paragjykim duket se është i parakohshëm. Pak ditë më parë edhe vetë Kryetari I PD-së, Lulzim Basha, paralajmëroi se nëse nuk fillon zbatimi i ligjit për “Dekriminalizimin”, PD nuk do të votojë Reformën Zgjedhore. Tashmë në rendin e ditës së opozitës duket se është bojkoti në disa forma. Sot nisi me bojkotin e punës në komisionet parlamentare, nesër pritet që ai të përshkallëzohet edhe me një bojkot të Kuvendit.
Reagon PS
Lidhur me këtë bojkot të papritur ka reaguar edhe deputeti i PS-së, Fatmir Toçi. Sipas tij, nuk është normal ky vendim i papritur i opozitës për të bojkotuar punën e komsioneve parlamentare. “Komisioni i medias nuk arriti të fillojë nga puna për shkak të bojkotit. Ishte vetë PD-ja që kishte kërkuar një dëgjesë në këtë komision. Por mesa duket opozita ka vendosur të shkojë te tregu i vezëve dhe jo të vij në komsionin parlamentar” u shpreh Toçi.
(javanews.al) Me. Ar
