Partia Demokratike, përmes nënkryetarit të Komisionit Parlamentar të Ekonomisë, Eno Bozdo, akuzoi Qeverinë për neglizhencë në marrjen e masave lidhur me çështjen e rritjes së çmimit të naftës.
“Është shqetësues fakti që qeveria shqiptare, edhe pse fiton më shumë kur çmimi i naftës rritet – dhe kjo gjë po ndodh – nuk ka ndërmend t’i përdorë këto të ardhura shtesë për qytetarët dhe ekonominë e saj. Angazhimi ynë pranë Agjencisë Ndërkombëtare të Energjisë, si dhe drejtivës përkatëse të BE-së, sanksionon detyrimin ligjor që kompanitë shqiptare të mbajnë një rezervë nafte të barabartë me 61 ditë konsum ose 90 ditë importe”, tha Bozdo.
Ai shtoi se PD-ja të hënën e javës së ardhshme do të depozitojë në Kuvend një nismë ligjore për mekanizmin kontrollues.
“Ditën e hënë, grupi parlamentar i Partisë Demokratike do të depozitojë në Kuvend një projektligj që do ta detyrojë qeverinë, në rastin e krizave energjetike të shkaktuara nga situata globale ose nga forca madhore, të marrë automatikisht masa për të mbajtur nën kontroll çmimin e karburantit. Me anë të këtij projektligji, synojmë të zgjidhim atë që të gjitha qeveritë e rajonit dhe Bashkimi Evropian e zgjidhin për shkak të detyrimit të tyre për t’i shërbyer qytetarëve të tyre. Kur qeverisë nuk i intereson, duhet të kemi një mekanizëm detyrues që ndihmon shqiptarët dhe ekonominë kombëtare,”tha ai.
