Ish kreu i grupit parlamentar të PD, deputeti Astrit Patozi tha se për një gjë është dakort me Ramën, për nevojnë për të larguar kreun e kuvendit Ilir Meta. Duke komentuar nismën e qeverisë “Të pastrojmë më tej Shqipërinë” Patozi theksoi se nuk ka det që do ta lante Shqipërinë, e cila sipas tij është baltosur nga qeveria Rama. Patozi theksoi se dëshira e tij për të larguar nga pushteti Ilir Metën është e madhe, pavarësisht faktit se kryeministri nuk e tregon më as nëpër bisedat në tavolina konfidenciale.
“Unë bie plotësisht dakord me Edi Ramën, se Shqipëria duhet pastruar edhe nga korrupsioni i Ilir Metës dhe i LSIsë, me ndryshimin e madh, që ai e nënkupton, por nuk guxon dot kurrë ta thotë, edhe në tavolina konfidenciale, e jo më në publik.
Por unë nuk e ndaj dot atë nga hajdutëria e njëjtë, nganjëherë edhe superiore, sidomos në muajjt e fundit, nën flamurin e ministrave dhe zyrtarëve të Partisë Socialiste.
Por problemi qëndron se Edi Rama, do ta pastrojë Shqipërinë nga Ilir Meta, jo se e shqetëson korrupsioni i tij, por se nuk po shkojnë mirë kohët e fundit. Njësoj si Tomë Doshin e shndërroi brenda ditës, nga superdeputet të Veriut, në mafioz të rrezikshëm, ndërsa Mark Frrokun, nga aleat të çmuar, në vrasës të burgosur dhe pa mandat,
Ndaj edhe nuk ka më asnjë vlerë aksioni i nënkuptuar i pastrimit të Edi Ramës për Ilir Metën, në një duel që tashmë konsiderohet i përfunduar në epërsi të thellë të të dytit. Natyrisht, ky është një rivalitet I egër mes dy peshkaqenëve, që ne pak na intereson.
Por kështu si ka ardhur puna, nuk është çudi që fituesi ta detyrojë humbësin ta propozojë tek Presidenti i Republikës për medaljen “Nder i Kombit”, për kontribut të madh në luftën kundër korrupsionit.
Ndaj edhe ky buxhet nuk mbart thjesht krizën por edhe degradimin e një qeverie, që erdhi në pushtet me tërsëllëmë, duke vringëllirë me prepotencë 1 milion shuplakat, të cilat i konsideroi si dele të bindura vetëm për t’i mjelë dhe gënjyer një herë në katër vjet”- tha Patozi.
