Deputetja e Partisë Demokratike, Jorida Tabaku, në një video të postuar në rrjetet sociale në “Këndin e Fundjavës” u shpreh se ekonomia prodhuese dhe familjet shqiptare po paguajnë kostot e zhvlerësimit të euros, ndërsa flukset e pashpjeguara të valutës dhe pastrimi i parave deformojnë tregun.
Duke folur në rubrikën e saj në rrjetet sociale, ligjvënësja opozitare renditi industrinë fason dhe manifakturat, bujqësinë dhe familjet si humbësit më të mëdhenj të kësaj situate.
“Kur euro zhvlerësohet vazhdimisht, ndërsa eksportuesit fundosen, bujqësia bie dhe produktiviteti nuk shënon ndonjë rritje reale, qeveria nuk mund të përgjigjet me propagandë. Ajo duhet të përgjigjet me të dhëna”, u shpreh Tabaku.
Sipas saj, pasojat tashmë janë të dukshme në ekonominë reale.
“INSTAT-i ju thotë se bujqësia ka vite që tkurret. Ju thotë se fasoneria humbet kontrata dhe vende pune. Sipërmarrjet eksportuese ju thonë se zhvlerësimi i euros po u ul të ardhurat dhe po i çon drejt mbylljes. Familjet thonë se çmimet janë rritur”, deklaroi deputetja demokrate.
Tabaku ngriti shqetësimin edhe për përqendrimin e ekonomisë te ndërtimi. Sipas shifrave të paraqitura prej saj, ky sektor zë rreth 12.5% të Prodhimit të Brendshëm Bruto, nivelin më të lartë në rajon dhe rreth 2.5 herë më shumë se mesatarja e Bashkimit Europian.
Ajo theksoi se nuk mund të vendoset shenjë barazimi ndërmjet gjithë sektorit të ndërtimit dhe aktivitetit kriminal, por paralajmëroi se dosjet e viteve të fundit tregojnë përdorimin e ndërtimeve dhe pasurive të paluajtshme si kanale të dyshuara për pastrimin e parave.
“Askush nuk mund dhe nuk duhet të pretendojë se çdo ndërtues është kriminal apo se çdo investim është produkt i parave të pista. Por dosjet penale tregojnë se ndërtimi dhe pasuritë e paluajtshme janë përdorur si kanale të dyshuara pastrimi në disa prej çështjeve më të mëdha të viteve të fundit”, tha Tabaku.
Sipas saj, hyrja e kapitalit kriminal në ekonomi dëmton konkurrencën e ndershme, rrit çmimet e pronave dhe dobëson bizneset që punojnë, prodhojnë dhe paguajnë rregullisht taksat.
“Pastrimi i parave nuk i sjell Shqipërisë zhvillim. Ai sjell rritje pa mirëqenie, ndërtime pa qytet, kapital pa prodhim dhe pasuri pa punë. Ai rrit çmimet e pronave për familjen e re që kërkon një apartament. Ai ul vlerën e punës së eksportuesit”, deklaroi ajo.
Tabaku kërkoi verifikim real të pronarëve përfitues, deklarim të detyrueshëm të burimit të fondeve për transaksionet e mëdha të pasurive të paluajtshme dhe transparencë mbi financimin e projekteve të ndërtimit.
“Shqipërisë nuk i mungojnë paratë. Shqipërisë i mungon drejtësia në mënyrën se si krijohen, si taksohen dhe si investohen ato”, përfundoi Tabaku.
