Pasi liderët e Europës mbërritën në Tiranë në samitin e Komunitetit Politik Europian, ku kanë përgëzuar për fitoren e zgjedhjeve Partinë Socialiste dhe Edi Ramën, sot Berisha ka dhënë një deklaratë për shtyp pas vizitës, i vetëm në Bruksel një ditë më parë në një forum të quajtur ‘Bashkimi Demokrat’.
Vlen të theksohet se forumi në të cilin ishte pjesëmarrës Berisha nuk kishte asnjë logo prezantuese, gjatë video mesazhit të tij dhe as i njohur mbi rëndësinë e përfaqësimit të partive të djathta në Europë.
Berisha ka vijuar retorikën e justifikimit për humbjen e zgjedhjeve duke thënë se shkoi në Bruksel, të denonconte farsën krejt i vetëm, në një video ku nuk dukej asnjë përfaqësues i njohur ndërkombëtar. Nga ana tjetër, liderët e pranishëm kanë shprehur dhe mbështetjen për Shqipërinë në integrimin europian.
Përtej kësaj, deklarata e Berishës vjen edhe në momentin kur paralelisht në Tiranë po zhvillohet Forumi Ekonomik Ndërkombëtar FII, ku Presidenti i Francës, Emmanuel Macron, ka shprehur se Shqipëria është një vend i sigurt për investime dhe ka stabilitet.
Ashtu siç nuk ka njohur rezultatin e votave brenda Shqipërisë, kreu i PD-së, Sali Berisha, paralajmëron të kontestojë edhe votën e diasporës. Për të dyja rastet, me akuzat se zgjedhjet u vodhën.
“Dje u ktheva nga Brukseli, ku mora pjesë në Forumin e Bashkimit Demokrat Ndërkombëtar, organizatë të qendrës së djathtë dhe konservatore. Qëllimi i këtij udhëtimi ishte mbrojtja e votës së qytetarëve shqiptarë. Denoncimi i farsës më të shëmtuar elektorale dhe i 34 viteve elektorale të 11 majit 2025. Gjatë dy ditëve në Bruksel unë pata takime intensive me drejtuesit kryesorë të Bashkimit Ndërkombëtar, me Stefan Harper dhe Sekretarin e Përgjithshëm Tina Mercep, ndër të tjera takova shumë miq të vjetër por edhe miq të rinj në Europë dhe në botë. Takova europarlamentarë me interesa për proceset elektorale në Shqipëri”, tha Berisha.
Berisha tha se bonusi i pensionistëve ishte blerje e votës së tyre nga qeveria.
“Në të gjitha këto takime unë njoha bashkëbiseduesit e mi me vjedhjen e madhe nga narkodiktatori Edi Rama. Në këtë aspekt u paraqitën vendimet e qeverisë për bonusin famoz, 100 euro për votë për çdo pensionist dhe për të falur gjobat. Punësimet, dhjetëra mijëra punësime për votë dhe dhjetëra hektarë kanabis për votë.”-tha Berisha.
Nga ana tjetër Berisha ka kërcënuar dhe ambasadat në Shqipëri, duke i quajtur ato si pjesë e narkoshtetit. Berisha ka kërcënuar ndërkombëtarët duke thënë se shumë shpejt populli do t’i rrethojë, se vota e tyre është shkelmuar sipas tij në 11 Maj.
“Të garantoj që shpejt ambasadat e narkodiktatorit do të rrethohen nga populli, të cilit iu shkelmua vota. Edi Rama ka shpalosur armiqësinë më të egër ndaj votës së shqiptarëve. Këtë mandat nuk do ta përfundojë për këtë masakër elektorale”, tha Berisha.
