Një rast tronditës raportohet në Sesto San Giovanni, Itali, ku një 62-vjeçar turk i quajtur Hayati Aroyo është vrarë dhe trupi i tij është shkrumbuar në një banesë më 23 korrik 2025.
Për ngjarjen janë arrestuar tre persona, përfshirë një shtetas shqiptar.
Hetimet e Policisë treguan se viktima ishte goditur 30 herë me thikë. Më pas autorët kanë tentuar të fshihnin gjurmët duke djegur trupin dhe apartamentin.
Rrjeti i marrëdhënieve të viktimës, analiza e kryer nga pamjet e kamerave të sigurisë, bisedat telefonike apo përgjimet çuan në identifikimin dhe arrestimin e tre personave: një shqiptar 33-vjeçar, një italian 38-vjeçar dhe një grua italiane, 36 vjeç.
Motivi? Një video intime
Mësohet se motivi i krimit ishte frika se viktima do të shpërndante një video intime online ku shfaqej gruaja italiane.
Shqiptari thuhet se ka pasur rol kyç në vrasje, duke bashkëpunuar me italianen, ndërsa burri tjetër ka ruajtur apartamentin teksa kryhej krimi i rëndë. Dyshohet se viktima do të takonte italianen. Kjo e fundit, hetuesit thonë se e la derën hapur për shqiptarin, i cili e goditi 62 vjeçarin në befasi. Trupi më pas u vendos mbi shtrat, i hodhën zbardhues dhe e dogjën.
Të tre të arrestuarit do të përballen me akuza për vrasje të rënduar, plaçkitje, zjarrvënie dhe shkatërrim të trupit të viktimës.
Shqiptari rrëfeu mizorinë
Ishte shqiptari ai i cili rrëfeu krimin makabër, pasi tentativa e tij për t’u arratisur drejt Kroacisë dështoi. 36 vjeçarja, ishte shoqja e tij, protagoniste në videon që kishte pasur viktima të ruajtur në një tablet, i cili pas vrasjes u mor bashkë me shuma parash, një celular dhe tre karta krediti.
Një ditë pas ngjarjes, me kartat ishin kryer pagesa në një një sallë lojërash në Busto Arsizio. Kjo ishte edhe pikënisja e hetimit…
Po kush ishte 62 vjeçari turk?
Hayati Aroyo, ishte dhëndri i Huseyin Saral, një person i lidhur me krimin e organizuar turk, i cili u vra në Crotone më 31 janar 2005.
Sipas disa mediave, hetuesit e zbuluan këtë gjë pasi gjetën disa gazeta në shtëpinë e të ndjerit që lidhen me vrasjen e Saralit, vëllait të gruas së tij. Ishte zjarri në apartamentin e tij në katin e parë të pallatit, ai i cili alarmoi forcat policore dhe zjarrfikësit, për të gjetur trupin e tij thuajse të shpërbërë nga flakët.
