Pasi dështoi në Beograd, UEFA sjell kryepolicin e saj në Tiranë
Ka dështuar totalisht në detyrën e tij gjatë ndeshjes së zhvilluar një vit më parë në Beograd mes Serbisë dhe Shqipërisë, takim i cili precipitoi në një dhunë të paprecedentë. Për këtë arsye dhe të tjera, Kenny Scott, ka mbërritur në Shqipëri me dorë të hekurt për sfidën e kthimit të datës 8 tetor, mes Shqipërisë dhe Serbisë. Kenny Scott është pronari dhe përgjegjësi i një kompanie që ofron të gjitha shërbimet që lidhen me sigurinë në sporte. Pikërisht në këtë cilësi, numri 1 sa i takon vlerësimit dhe përcaktimit të masave që lidhen me sigurinë në organizimin dhe mbarëvajtjen e aktiviteteve të futbollit europian ka mbërritur sot në Tiranë dhe ka zhvilluar takimet e para në FSHF me drejtuesit më të lartë të këtij institucioni.
Në vijim të takimeve të mëparshme që drejtuesit më të lartë të FSHF-së kanë zhvilluar me krerët e policisë së shtetit, njëherësh edhe pas diskutimeve me “krye-policin” e UEFA-s, një delegacion me ekspertët më të mirë të kësaj fushe nga Drejtoria e Përgjithshme e Policisë kanë kryer gjatë ditës së sotme inspektimin e parë në “Elbasan Arena”, në kuadër të planifikimit të masave për eventin e datës 8 tetor.
