Lulzim Basha ja ka arritur të shkojë deri në një pikë që askush s’e mendonte. Ai po përpiqet t’i imponojë Komisionit të Venecias, i cili duket se do ta kalojë ligjin e Vetingut me përgjigje pozitive, një variant tjetër nga ai që Komisioni po shqyrton, me pretesktin se teksti i parë ka “gabime përkthimi”. E gjitha kjo ndodh në një moment kur pritet përgjigja rreth kushtetutshmërisë së këtij ligji kyç për Reformën në Drejtësi dhe kur sytë janë drejtuar nga qyteti bregdetar italian, për një verdikt që shpresohet të shbllokojë procesin e ngecur me shkopinjtë nën rrota të opozitës dhe të një pjese të korruptuar të sistemit të drejtësisë.
Ne nuk e dimë nëse teksti i Vetingut që kanë në duar ekspertët e thinjur të Venecias, është ose jo i saktë nga ana gjuhësore. Dimë megjithatë qysh tani, cilido qoftë vendimi final i Komisionit të Venecias, se kemi një opozitë qesharake, e cila po shkon pa ngurrim drejt absurdit në veprimet e saj, vetëm e vetëm që të mbajë edhe pak të penguar Vetingun. E bashkë me të, shpresojnë, edhe vendimin për hapjen e negociatave të anëtarësimit në Bashkimin Europian.
Që mund të kishim një sektor të elitës politike që nuk e do reformën në drejtësi, kjo ishte e kuptueshme dhe e shpjegueshme. Që ka gjithashtu edhe plot gjyqtarë e prokurorë të interesuar që reforma të përfundojë në farsë, edhe kjo dihet, për arsye mëse të kuptueshme. Por që të kishim edhe një opozitë qesharake dhe krejt joserioze si kjo e sotmja, që po ul veten dhe vendin përballë forumeve e institucioneve serioze ndërkombëtare, këtë duhej ta mësonim sot, pasi dëgjuam gabimet ortografike të një ligji. Të cilin e kujtonim si të “frikshëm”, “revanshist”, “antidemokratik” etjetj, por nuk e dinim se paska qenë edhe …plot gabime gramatikore!/ Javanews/
