Familjet në nevojë të cilët frekuentojnë mensën sociale në Kombinat kanë festuar këtë të dielë në mënyrë të veçantë Pashkët. Kryebashkiaku Erjon Veliaj ka shtruar një drekë të veçantë për ta. Por ndryshe nga vitet e tjera, surpriza ka qenë këngëtarja e muzikës popullore Eli Fara si dhe mjeshtri i kuzhinës Renato Mekolli.
Në festën e Pashkëve, kryebashkiaku i Tiranës Erjon Veliaj ofroi një drekë për të moshuarit dhe familjet në nevojë që frekuentojnë mensën sociale në Kombinat.
Ndryshe nga vitet e shkuara, këtë të dielë surpriza ishte këngëtarja e muzikës popullore qytetare, Eli Fara, si dhe një prej mjeshtrave më të mirë të kuzhinës, Renato Mekolli.
Veliaj: “Kjo është një nga 5 qendrat tona sociale ku ne shërbejmë. Më shumë se shërbimi i një vakti çdo ditë, ky është një vend ku kalojmë kohën, ku ndërtojmë komunitet, ku pavarësisht halleve, problemeve, secili gjen një vesh që ta dëgjojë.
Pavarësisht sfidave të jetës, pavarësisht emigracionit apo të qenurit larg vendeve nga ku vjen secili, këtu është krijuar një çerdhe, një hapësirë shumë e ngrohtë, një atmosferë ku të gjithë mbështesim njëri tjetrin, por edhe kalojmë kohë me njëri tjetrin, po sidomos në ditët speciale të festave jemi gjithmonë e më pranë. Kështu që, e vlerësoj shumë praninë tuaj sot”.
Ai shtoi se festa të tilla duhet të jenë momente reflektimi edhe për të menduar sesi mund ta bëjmë vendin tonë më të mire.
Veliaj: “Ne ndoshta vijmë njëherë kur ka festa, por ata janë përditë këtu, kaluan një situatë shumë të vështirë me emergjencat civile, por fakti që përveç atyre që ishin në terren, si zjarrfikës, si punonjës të emergjencave, kemi patur gjithmonë një strehë të tillë edhe për të ndihmuar ata që në raste të emergjencave civile kanë patur nevojë që të strehohen sidomos ditët e ftohta dhe me shi”.
Për këngëtaren Eli Fara, prezenca në mensën sociale përcjell emocione të veçanta.
Fara: “Kënaqësi që ndodhem sot këtu. Pata emocione në fakt dhe e bëra me shumë qejf sepse kush më shumë se mosha e tretë ka nevojë për dashuri dhe për njerëz. Është kënaqësi e madhe për mua, por edhe për të gjithë që t’u bëj të buzëqeshni, t’u ndihmoj me sa mundem të gjithëve.”
Ndërsa Renato Mekolli një urim të veçantë dha për të gjithë ata persona që u shërbejnë njerëzve në nevojë. /Ora News.tv/
