Avokatja Elona Berki ka sqaruar se pjesa më e madhe e qytetarëve nuk janë të informuar se pasagjeri ka të drejtë të dëmshpërblehet financiarisht në rast aksidenti në automjetin me të cilin udhëton.
“Pasagjeri ka të drejtë të kërkojë dëmshpërblim edhe në rast se shoferi ka qenë fajtor… në çfarëdolloj rasti, ti ke të drejtë të shpërblehesh dhe janë ato afatet ligjore që brenda tre viteve ti ke të drejtë të kërkosh dëmshpërblimin prapë kompanisë së sigurimeve të makinës, ku ke qenë pasagjer.”
Berki sqaroi në Tv Klan se ky akt vlen si dëmshpërblim i palëve të treta edhe nëse makina nuk mbulon siguracion për pasagjerët, pasi ata konsiderohen palë të pafajshme në aksident.
“Kompanitë e sigurimit nuk janë të gatshme, prandaj gjithmonë konsiderohet marrja e një profesionisti për të tentuar ndërmjetësimin apo marrëveshjen me kompaninë e sigurimit.”
Avokatja Berki bëri të ditur se edhe në rastet e një aksidenti, kur udhëton me një mjet urban apo shërbim taksi, çdo person ka të drejtën të shpërblehet financiarisht për dëmin e shkaktuar.
Ajo gjithashtu përmendi se mund të konsiderohen të gjitha dëmet që mund t’i ndodhin pasagjerit, qoftë dëme fizike apo psikologjike, si traumat, madje edhe dëmi ekzistencial, që përfshin pasojat që personi mund të ketë pasur gjatë jetës nga një ngjarje e caktuar aksidenti.
