Maxhoranca kaloi me 87 vota pro ligjin “Për organet e qeverisjes së sistemit të drejtësisë”, i fundit që plotëson paketën e Reformës në Drejtësi. Me 86 vota kaluan ndryshimet në Kodin Civil dhe 87 vota pro ndryshimet në Kodin e Procedurës Civile.
Në votim shumica ishte kompakte me votat e Grupit Parlamentar të PS-së, përfshirë edhe deputetët Ben Blushi e Mimoza Hafizi, Grupin Parlamentar të LSI-së dhe Grupin Parlamentar të PDIU-së. Por ajo që habiti ishte vota e deputetit të PD-së, Mhill Fufi, raporton “Panorama”.
Për kalimin e ligjeve duheshin vetëm 84 vota, që maxhoranca nuk i rrezikoi për asnjë moment, duke e bërë bashkimin e Fufit me qeverinë si një akt shtesë që s’kishte si qëllim vetëm miratimin e ligjeve. Vendimi i Fufit për t’iu bashkuar votave të maxhorancës vjen në një moment kur ka shumë dyshime për kompaktësinë e aleancës lidhur me votimin e ligjit të mbetjeve.
Opozita e ka quajtur votimin e dekretit të Nishanit si njëlloj mocioni të qeverisë. Ndërsa dy aleatët, LSI e PDIU, akoma nuk kanë mbajtur një qëndrim të qartë a do votojnë pro apo kundër ligjit. Përmes një vendimi të marrë në orët e vona në selinë e Partisë Demokratike, Mhill Fufi u përjashtua nga Grupi Parlamentar.
DREJTËSIA
Përfaqësuesit e opozitës, përpara se të largoheshin nga Parlamenti, kërkuan nga përfaqësuesit e maxhorancës të mos e fusnin për votim ligjin “Për organet e qeverisjes së sistemit të drejtësisë”, që lidhet me krijimin e KLGJ-së dhe KLP-së.
Nënkryetari i Komisionit për Reformën në Drejtësi, Oerd Bylykbashi, deklaroi se deputetja e PS-së, Vasilika Hysi, në kundërshtim me rregullat parlamentare, ka paraqitur 104 amendamente për një ligj që nuk ishte votuar ende. Bylykbashi kërkoi kohë që opozita të njihej me këto ndryshime, në mënyrë që të jepte edhe ajo reflektimet e saj.
“Në përputhje me rregulloren, është mirë që këto amendamente të rishqyrtohen në përputhje me rregulloren, ndoshta gjejmë një zgjidhje tjetër që ta kthejë projektligjin në përputhje me Kushtetutën e datës 22 korrik”, tha Bylykbashi.
Kryetari i Kuvendit, Ilir Meta, kërkoi mendimin e kryetarit të Reformës në Drejtësi, Fatmir Xhafa, për këtë çështje. Ky i fundit nxori në pah negociatat e bëra me ekspertët e OPDAT- it dhe EURALIUS-it për kalimin e këtyre ndryshimeve.
“Ka një korrespondencë të plotë komunikimi midis zonjës Hysi dhe zotit Bylykbashi, midis zotit Bylykbashi dhe partnerëve ndërkombëtarë. Kërkesa nuk u mor parasysh, çka solli largimin e demokratëve nga sallë e Kuvendit”, tha Xhafaj, duke kërkuar votimin e ligjit. Pas këtij vendimi, përfaqësuesit e opozitës braktisën sallën e Parlamentit.
AMENDAMENTET
Thelbi i ndryshimeve në amendamentet e paraqitura nga deputetja e PS-së, Vasilika Hysi, lidhej me mënyrën e përzgjedhjes së anëtarëve jogjyqtarë në Këshillin e Lartë të Drejtësisë. Opozita kishte kërkuar që këta persona të aplikonin në Kuvendin e Shqipërisë dhe përmes votës në Parlament ata të zgjidheshin.
Ndërkohë, në amendamentin nr.11 të propozuar nga deputetja e PS-së Hysi përcaktohet se për përzgjedhjen e këtyre anëtarëve duhet të ngrihet një komision ad hoc për verifikimin dhe vlerësimin paraprak të kandidatëve.
Ky komision do të përbëhet nga: Avokati i Popullit, kryetari i Këshillit të Emërimeve, dy avokatë, më i riu dhe më i vjetri në moshë dhe një anëtar i rregullt i Akademisë së Shkencave./Panorama/.m.
