Pas një sërë orësh kërkime është gjetur më në fund skafi dhe me të së bashku edhe qytetari Ardian Jahaj, i cili kishte dhënë alarmin se i kishte mbaruar karburanti në rrugën e tij nga Itali për në Shqipëri.
Skafi privat i Jahajt është gjetur më shumë se 10 milje larg ishullit të Sazanit, ndërsa me të ka qenë edhe një tjetër pasagjer, sipas raportimeve të para i shtetësisë italiane.
Jahaj dha alarmin se i kishte mbaruar karburanti në orën 6:00 të këtij mëngjesi, përmes një telefonate drejtuar të birit, i cili më pas njoftoi policinë.
Menjëherë është njoftuar dhe ushtria. Ilir Çobo, Kapiteni i anijes ushtarake “Iliria” ka thënë rreth orës 16:40 minuta se e kanë gjetur skafin me Jahajn në të dhe po e sjellin në Durrës. Bashkë me Jahajn në skaf është edhe një qytetar italian. Të dy duket se janë në gjendje të rëndë shëndetësore./java/a.k
