Kryeministri Rama dhe kryetari i Partisë Demokratike, Lulzim Basha, do të takohen sot pasdite në Pallatin e Kongreseve. Negociatat mes dy kampeve kanë vijuar deri në orët e vona të ditës së djeshme, ndërsa disa çështje kanë mbetur pezull për t’u zgjidhur sot paradite.
Oerd Bylykbashi dhe Fatmir Xhafaj kanë pasur një fundjavë të ngjeshur negociatash për çështjet që do të diskutohen mes Ramës dhe Bashës. Ata kanë punuar për të hartuar një draft që do t’ia paraqesin dy liderëve politikë në tryezën e tyre, por ende mbeten çështje të pazgjidhura.
E ndërsa Partia Socialiste, përmes Kryeministrit Rama ka pranuar kërkesën e PD-së për zgjedhjen e anëtarëve të gjykatave me 2/3 e votave, ende mbetet pa zgjidhje kërkesa e re e demokratëve, ajo e vendeve të rezervuara. Përmes saj, në të gjitha institucionet e drejtësisë që do të zgjidhen nga Parlamenti, opozita dhe maxhoranca do të kenë vendet e tyre të përcaktuara.
Mësohet se maxhoranca nuk e pranon këtë kërkesë. Këto negociata janë zhvilluar nën prezencën e faktorit ndërkombëtar që ditët e fundit ka artikuluar nevojën e miratimit të Reformës në Drejtësi nga zyrtarë të lartë në Uashington dhe Bruksel.
Mësohet se nga negociatat e deritanishme është rënë dakord që Kryeministri Rama të shoqërohet nga kryetari i Komisionit të Posaçëm të Reformës, Fatmir Xhafaj, ndërsa kreu i opozitës Lulzim Basha nga nënkryetari i komisionit të kësaj reforme, Oerd Bylykbashi. Nuk dihet nëse kësaj tryeze do t’i bashkohen dhe deputetë të tjerë.
Panorama/d.i.
