Pas kryebashkiakes së Berlinit, Kryeministri Edi Rama ka takuar Presidentin e Gjermanisë, Frank-Walter Steinmeier, në kuadër të vizitës së tij 3 ditore.
Kryeministri Rama dhe Presidenti Steinmeier vlerësuan marrëdhëniet shumë të mira që ekzistojnë mes dy vendeve dhe shprehën angazhimin e përbashkët për thellimin e tyre të mëtejshëm. Bashkebiseduesit dakordësuan vijimin e bashkëpunimit mes Gjermanisë dhe Shqipërisë, në fusha me interes të ndërsjellë.
Biseda u përqëndrua në integrimin europian të Shqipërisë me theks të veçantë në rolin mbështetës që Gjermania ka luajtur dhe vijon të luajë në këtë drejtim. Po ashtu, aktualiteti në Ukrainë dhe ngjarjet më të fundit që prodhoi agresioni i Rusisë atje ishin një prej temave kryesore të bisedës.
Më herët gjatë qëndrimit të tij në kryeqytetin gjerman, Rama takoi kryebashkiaken Franziska Giffey.
Kreu i qeverisë shqiptare vizitoi dhe ambientet e Bashkisë së Berlinit, ndërsa la një shënim të tij në librin ‘e përshtypjeve’.
Kryebashkiakja e Berlinit i dorëzoi Ramës një dhuratë, ndërkohë që edhe kreu i qeverisë shqiptare i dorëzoi një model artizanal të këpucëve tipike shqiptare, të punuara me dorë.
Sipas axhendës, në orën 18:00, Rama do të takohet me kancelarin gjerman, Olaf Scholz, ndërsa në orën 18:15, do të dalin në një konferencë të përbashkët./m.j
