Ish-anëtari i Këshillit Kombëtar të PD-së, Edvin Kulluri, ka reaguar pas videos së shpërndarë sot nga selia blu, ku i atribuohet në mënyrë propagandistike Lulzim Bashës çdo arritje e qeverisë Berisha.
Në një postim në rrjetet sociale, Kulluri ka ironizuar kryetarin e Republikës së Re, teksa thotë se po pret spotin e radhës me arritjet e Bashës në krye të opozitës që nga viti 2015 e deri më tani.
“Pas këtij spotit që ka bërë Basha për arritjet e tij si “ish-Kryeministër” i PD nga 2005 në 2013, po pres që të nxjerrë spotin tjetër me sukseset si kryetar i PD në opozitë që nga fitorja në zgjedhjet e 2015, 2017 dhe fitoren historike të zgjedhjeve lokale të 2019 me 85%!”, shkruan politikani.
Kujtojmë se sot Republika e Re tentoi t’i atribuojë Lulzim Bashës çdo gjë të arritur gjatë qeverisjes së Partisë Demokratike, që nga anëtarësimi në NATO e deri te liberalizimi i vizave, duke harruar skandalet që në të cilat ai është përfshirë gjatë kohës që ka mbajtur poste ministrash.
Pak më parë edhe Jozefina Topalli reagoi me ironi ndaj spotit të Bashës, ku e cilësoi edhe si manipulator e dështak.
/e.rr
