Sot ishte planifikuar edhe konsituimi i Këshillit Bashkiak të Kavajës, që doli pas zgjedhjeve të 30 qershorit dhe në të njëjtën kohë betimi i kryebashkiakut të ri të Partisë Socialiste.
Por rrotacioni i pushtetit lokal në këtë bashki nuk po funksionon normalisht. Kryebashkiaku, me mandat të përfunduar Isa Sakja nuk e liron zyrën, përkundrazi e konsideron një ditë normale pune, teksa tregon edhe orarin se do të jetë në punë.
Ndërkohë në ambientet e jashtme janë grumbulluar mjaft qytetarë, që presin me ankth se çfarë do të ndodhë me bashkinë, që duhet mbi të gjitha të plotësojë nevojat e tyre.
Kryebashkiaku në ikje Isa Sakja thotë se në 30 qershor votuan vetëm 5 për qind e qytetarëve, ndërsa pohon se vetë ai është në zbatim të dekretit të presidentit, si kreut më të lartë të shtetit shqiptar.
Ndryshe nga situata e krijuar dje në Bashkinë e Devollit, para bashkisë së Kavajës nuk ka forca policie.
Redjan Krali u shpall fitues si kryebashkiak i Kavajës, në zgjedhjet e 30 qershorit dhe pritet të marrë zyrën.
Kryebashkiakët demokrat kanë paralajmëruar se nuk do ti lirojnë zyrat e tyre për tu vendosur kryebashiakët e rinj socialistë.
