Kryedemokrati Lulzim Basha, ka deklaruar mbrëmjen e sotme se prioriteti i opozitës është thellimi i bashkëpunimit me amerikanët.
Këtë deklaratë të tij Basha e bëri nga ceremonia e 10 vjetorit të themelimit të Fondit Shqiptaro-Amerikan të Zhvillimit.
Basha theksoi se nuk mund të lejohet më një qeverisje e mbyllur, inefiçente dhe infektive të bëhet pengesë për jetën e përditshme dhe të ardhmen e shqiptarëve.
“Dialogu me miqtë dhe partnerët tanë strategjikë është në zemër të së ardhmes plot shpresë për Shqipërinë.
Askush nuk duhet ta vërë në dyshim: e ardhmja jonë është plot me shpresë.
Por sot kombi ynë ndodhet në udhëkryq. Ndërkohë që duam të afrohemi më shumë drejt miqve dhe partnerëve tanë në Bashkimin Europian dhe Shtetet e Bashkuara, ne na pret një punë kolosale, me reforma dhe ndryshime të mëdha përpara.
Shqipëria është në krizë, dhe potenciali ynë i madh fatkeqësisht nuk po realizohet. Ndaj dhe koha kur jemi mbledhur për të përkujtuar 10 vjetorin e AADF është domethënëse.
Në këtë udhëkryq ku ndodhemi sot, ne na duhet të zgjedhim cilën rrugë do të marrim. Do të zgjedhim rrugën e lirisë, transparencës, llogaridhënies dhe zhvillimit?
Apo do vazhdojmë të ngecim në rrugën e tanishme, me marshin në indietro.
Zonja dhe zotërinj, miq,
Nuk kemi zgjedhje tjetër për veç se të marrim rrugën e parë. Rrugën e zhvillimit.
Dhe për ta bërë këtë të mundur, na duhet jo vetëm të punojmë ngushtësisht me ju, me miqtë e partnerët tanë euro-atlantikë, por të vëmë në jetë reforma dhe ndryshime të mëdha. Na duhet ta pastrojmë Shqipërinë’, ka thënë kreu i PD.
