Pas gjashtë ditësh përpjekjesh intensive, autoritetet kanë bërë të mundur këtë të hënë, 3 gusht, vënien nën kontroll të vatrës aktive të zjarrit në zonën pyjore të Dardhës, në kufi me Sopotin, duke parandaluar përhapjen e mëtejshme të flakëve.
Zjarri ka shkaktuar dëme të konsiderueshme mjedisore, duke përfshirë sipërfaqe të tëra me shkurre, pisha dhe dru pyjorë. Për shkak të terrenit të thyer malor, ndërhyrja e mjeteve zjarrfikëse ishte e pamundur në pjesën më të madhe të zonës, ndaj efektivët u detyruan të punonin për ditë me radhë me mjete krahu, deri në izolimin dhe vënien nën kontroll të plotë të flakëve.
Megjithatë, rreziku mbetet ende i lartë për shkak të temperaturave të larta dhe erës së fortë, të cilat mund të favorizojnë riaktivizimin e vatrave të zjarrit.
Autoritetet u kanë bërë thirrje banorëve të zonës, veçanërisht barinjve dhe personave që mbledhin bimë mjekësore, të tregojnë kujdes maksimal dhe të respektojnë masat parandaluese.
