Alban Hoxha i la ambientet e paraburgimit të Komisariatit 1 të kryeqytetit pas vendimit të gjykatës për “detyrim për paraqitje” për shkak se në orët para të mëngjesit të së dielës u kap duke drejtuar mjetin në efektin e alkoolit. Burime pranë klubit të kuq bëjnë me dije se zyrtarë të lartë të klubit do të takohen me futbollistin për të kuptuar gjendjen e tij pas kësaj ngjarjeje.
Tek Partizani 2 javë më parë u aplikuan gjoba për lojtarët e kapur duke frekuentuar jetën e natës dhe veprimi i Alban Hoxhës nuk do të kalojë pa u analizuar, ndoshta edhe ndëshkuar. Çështja e imazhit të klubit dhe respektimi i rregullores së brendshme janë tema delikate për Partizanin.
Por mbi të gjitha Alban Hoxha mund të jetë edhe jashtë kondicionit fizik. I detyruar të largohej edhe nga grumbullimi i kombëtares për një shqetësim në gju, Hoxha mungoi edhe në ndeshjen ndaj Flamurtarit. Për stafin teknik, prania e tij në formacionin titullar është një pikëpyetje e madhe. Në derbi mund të mungojë edhe një tjetër lojtar i rëndësishëm.
Lorenc Trashi mund të përballet me një ndëshkim nga komisioni i disiplinës në FSHF, pasi në ndeshjen ndaj flamurtarit debatoi në distancë me tifozët vendas që e ofenduar thuajse gjatë gjithë takimit.
Tek partizani ka probleme edhe me Esat Malën, i cili ka patur shqetësime fizike dhe ka qenë pushim në ditët e fundit. Mesfushori mund të jetë i gatshëm për derbi, por jo për të gjithë 90 minutëshin.
/b.d
