Në një situatë tensioni Kuvendi miratoi të enjten me votat e maxhorancës dekretet e Presidentit të Republikës për emërimin e dy ministrave të rinj, Arben Ahmetajt në postin e ministrit të Financave dhe Milva Ekonomit në postin e ministres së Ekonomisë. Me 77 vota deputetët miratuan emërimin në detyrë të Ahmetajt dhe me 76 vota emërimin e Ekonomit. Ndërsa me 74 vota parlamenti miratoi dekretin e shkarkimit të Shkëlqim Canit nga posti i ministrit të Financave dhe me 77 vota dekretin e shkarkimit të Arben Ahmetajt nga detyra ministrit të Ekonomisë.
Votimi u krye ndërsa deputetët e opozitës qëndronin në këmbë duke mbajtur të rrethuar foltoren e Kuvendit, në përpjekje për të bllokuar punimet e seancës së sotme.
Kryetari i grupit parlamentar te PD-se Edi Paloka ne fjalen e mbajtur në hapje të seances denoncoi rikthimin në parlament të deputetit Armando Prenga, i perfshire ne nje konflikt te armatosur pak muaj me pare.
“Jemi sot këtu për të thënë se zgjedhja jonë është ligji, është parlamenti pa kriminelë, janë zgjedhjet e lira e të ndershme, janë qytetarët që nuk kanë pse presin për ta zhbërë nga themeli regjimin kleptokrat te Ramës”, deklaroi Paloka.
Ky parlament nuk mund të funksionojë më kështu, tha ai, ose mbyllet sot, ose vendosim të ecim pa krimin, ndryshe nuk ka më seancë, tha Paloka.
Në nisje të seancës nënkryetarja e Kuvendit, Valentina Leskaj, bëri të ditur vendimin e Konferencës së Kryetarëve për rrëzimin e kërkesës së PD-së, për shqyrtimin me procedurë të përshpejtuar të dy nismave të propozuara nga opozita për ndryshimin e ligjit të dekriminalizimit dhe të ligjit për funksionimin e komisioneve hetimore.
Në seancën e sotme pritet të votohen katër dekretet e Presidentit të Republikës për emërim dhe shkarkim ministrash. Krahas tyre, rendi i ditës parashikon dhe diskutimin e disa ndryshimeve në ligjin ‘për rritjen e masave të sigurisë’.
Ndërkohë jashtë axhendës së ditës debati sundues pritet të jetë çështja e dekriminalizimit, për të cilin opozita ka kërkuar miratimin në seancën e sotme të akteve nënligjore, që do t’i hapnin rrugën zbatimit të shpejtë të kësaj pakete.
Në prag të nisjes së seancës, deputetët, ndërsa hynin në ambjentet e parlamentit, iu nënshtruan kontrolleve të rrepta të punonjësve të Gardës, pas sinjalizimeve të strukturave të sigurisë se kishte një skenar të përfaqësuesve të opozitës për të qëlluar me vezë në sallën e Kuvendit.
