Është shoqëruar me debate të ashpra, akuza dhe kundërakuza seanca e sotme plenare midis deputetit socialist Taulant Balla, dhe ish-kryeparlamentares Jozefina Topalli.
Në një kohë që debatet ishin devijuar nga rendi i ditës, dhe kur demokratët nëpërmjet Sali Berishës dhe Jozefina Topallit po akuzonin kryeministrin Rama se ka dekoruar xhelatë të komunizmit, deputeti Taulant Balla akuzoi drejtpërdrejt ish-kryetaren e Parlamentit se i ka shërbyer sigurimit të diktaturës me nofkën “dizenjatorja”
Gjithçka nisi kur Topalli i tha deputetit socialist se ai ka kënduar këngë për Enver Hoxhën dhe tani i mbetet thjesht të bëjë një album. Ndërsa ky i fundit i kërkoi deputetes demokrate që të shpjegojë përse e ka pasur pseudonimin “dizenjatorja”. Deklaratat e të dyve më pas vijuan me tone të larta, dhe me ofendime, ku Topalli e ka quajtur Ballën shpifës me pagesë, ndërsa ky i fundit tha se ka qenë Topalli ajo që e ka nisur karrierën duke bërë kafe. “Partia Socialiste nuk mund të përfaqësohet kurrë nga një bastard si ti”, iu drejtua Topalli Ballës.
Ja replikat Balla-Topalli
Balla: Janë dy personazhe në këtë Kuvend që ngjajnë copy paste me dy personazhe filmash. Kjo që sapo foli ngjan copypaste me brigadieren tek filmi “Parrullat” dhe ai që iku para pak është njëlloj personazhi i sekretarit të partisë tek filmi “Vdekja e Kalit”. Njëlloj të dy. Ngjajnë, hallall ia bëftë dora atij që ka shkruar skenaret e atyre dy filmave se të paktën na kanë ngurtësuar në histori këta dy personazhe partiakë. U çove në mëngjes dhe u ankove pse kryeministri është në Francë. U çove ti me kolegët e tu. Thatë që pse nuk është kryeministri. Kryeministri ka përfunduar një vizitë shumë të suksesshme zyrtare në Francë, me ftesë të kryeministrit francez. Koha që drejtuesit e Parlamentit shkonin në Francë për të vizituar fëmijët që kishin në Francë ka mbaruar.
Topalli: Vetëm t’i flet nga PS se asnjëri nuk ka kurajo t’i dalë zot krimit. I njohur si shpifës me pagesë. E di pse je rritur ti me karrierë? Ti karrierën e ke filluar duke i çuar kafe Agim Isakut, as Fatos Nanos nuk i hyje dot në zyrë. E ke ngjit karrierën vetëm se shpif pa masë. Mendimet e mia i them aty ku jam. Stë lë ty të shpifës as për kryetarin e partisë. Ka vendim të gjykatës sës Strasburgut.
Balla: Unë kam lindur në ‘77 zonjë, dhe nuk kam pasur mundësi që të kem qënë as anëtar partie. Sa për prindërit e mi, njëri mësues, tjetra infermiere njerëz të ndershëm. Ti ke një problem sepse ty komunizmi të ka lënë me pasoja. Ti zonjë thonë që ke pasur pseudonimin “Dizenjatorja”. Ke instituti mistrit kafet i bëje ti. Unë nuk kam bërë karrierë me kafe, ti shiko se ke një arsye të madhe pse ke bërë karrierë ti. Nuk po ta them sot. Po ta kursej kësaj radhe.
Topalli: Nxirr jashtë Parlamentit të gjithë ata që shpifin pa u ndalë. Tani ti djalë ke 10 vite që shpif. Mbylle gojën, dëgjo! Ke 10 vite që çohesh dhe përpiqesh dhe mendon se më godet mua aty ku është pika ime më e fortë. Unë nuk e di çfarë do kisha bërë sikur të më kishin torturuar. Qesh more qesh se kjo është dita jote, janë kohë të marra.
Debatet Berisha-Balla
Më herët akuza të ashpra hodhi edhe ish-kryeminsitri Berisha në lidhje me dekorimin e disa figurave që për opozitën përbëjnë “xhelatë të komunizmit”.
“Edi Rama dekoron xhelatë të kategorisë së parë. Nuk di njeri tjetër në këtë sallë që të ketë shkruar dhe të ketë përdhosur luftën çlirimtare si Edi Rama. Të turpshme, shpifje të ulëta. Vlerësimi ndaj luftës të detyron dy herë të dënosh gjenocidin pas luftës. Të fton të mos bashkohesh kurrë me mizorinë pas luftës. Të gjitha ishin në funksion të pushtetit të Satanait”, tha Sali Berisha.
Maxhoranca u përgjigj me anë të nënkryetarit të grupit socialist, Taulant Balla, i cili nxorri sërish në foltoren e Kuvendit fotot e Berishës me Hysni Kapon dhe Vito Kapon në Francë si dhe foton e Berishës në varkë në liqenin e Pogradecit me djemtë e Enverit.
“Kjo që sapo foli (Topalli) ngjan me brigadieren te filmi “Parullat”, ndërsa ai që sapo iku është si sekretari i Partisë te “Vdekja e Kalit”. Ai (Berisha) ska shans ta heqë mbi vete damkën e një komunisti të keq. Na the këtu zonjë për Vito Kapon, tani si tia bëjmë ne kësaj fotos: Hysni Kapo, Vito Kapo, Sali Berisha te kulla Eifel. Pse nuk morën ndonjë doktor tjetër ata po morën doktorin tënd? Po teserën e partisë të shokut Sali? Pse nuk merrte ndonjë tjetër në këtë sallë çuni i Enverit në varkë, por merrte shokun Sali? E vetmja që nuk më bën me emocione je ti, mi ke hequr emocionet”, tha Balla.
