Një femër u arrestua bashkë me dy persona të tjerë si bashkëpunëtorë në kultivimin e bimëve narkotike.
Policia e Shkodrës vuri në pranga 21-vjeçaren L. Livalli, banuese në Grudë të Re, e cila akuzohet se bashkë me Prel Dushkun, 32 vjeç dhe Artan Livallin, 23 vjeç, kanë mbjellë kanabis.
Ata u zbuluan nga aksioni i kryer në këtë zonë. “Nga Shërbimet e Komisariatit të Policisë Shkodër, në bazë të informacioneve të siguruara në rrugë operative, është finalizuar me sukses operacioni i radhës, i koduar “Deadfall”.
Si rezultat i tij janë asgjësuar 5671 bimë të kultivuara në 24 parcela në fshatin Pepaj, një- sia administrative Shosh, Shkodër. Gjithashtu janë arrestuar në flagrancë 3 shtetas të dyshuar si kultivues të këtyre bimëve”, bëri të ditur Policia.
“Prel Dushku, Artan Livalli dhe L. Livalli akuzohen për kultivim të bimëve narkotike, të kryer në bashkëpunim. Materialet procedurale iu referuan Prokurorisë së Rrethit Gjyqësor Shkodër”, njoftoi Policia e Shkodrës. Po dje, në Memaliaj u zbuluan 7 parcela, ku ishin mbjellë 10.500 bimë të dyshuara kanabis sativa.
Në këtë zonë nuk u identifikuan dot autorët. Aksionet antidrogë vazhduan në Skrapar, ku u gjetën dhe u asgjësuan 1472 rrënjë bimë narkotike kanabis sativa. Bimët u gjetën në vendin e quajtur “Pylli i Guriazit”, njësia administrative Bogovë.
Po punohet për identifikimin dhe kapjen e autorëve. Një tjetër aksion antidrogë u organizua në Krujë, në fshatrat Mafsheq dhe Mallkuç, ku u zbuluan rreth 1 700 bimë narkotike, edhe këto pa autor.
