Arrestimi i tre të rinjve pak ditë më parë, si autorë të hedhjes në treg të kartëmonedhave false, ka ngritur shqetësimin e qarkullimit të parave false në vendin tonë. Në një vëzhgim në rrjetet sociale konstatohet se prerje të ndryshme të monedhave shqiptare dhe të huaja, shiten lehtësisht. Faqet anonime reklamojnë produktin e tyre, duke i cilësuar identik me origjinalin.
Një prej faqeve online, pretendon se Viard Kotori që shfaqet duke këmbyer 2 mijë dollarë false në një Exchange në Tiranë është klient i tyre. Ata porosisin klientët e tjerë që paratë false të mos i çojnë në pikat e këmbimit valutor, por në subjekte të tjera.
Falsifikatorët kanë publike edhe listën e çmimeve për blerjet e kartëmonedhave false. Lidhur me këtë aktivitet, ekspertët shprehen se këto para mund të printohen jashtë vendi dhe importohen nga grupe kriminale.
Eksperti Ervin Karamuço, apelon autoritetet e policisë të shtojnë vigjilencën dhe kontrollet, pasi tregu shqiptar është i rrezikuar nga paratë false.
Gjatë këtij viti policia ka zbuluar 7 raste të hedhjes në treg të parave false duke bërë arrestimin e 15 personave, si dhe procedimin tre të tjerëve.
Burime nga policia bëjnë me dije se ka dyshime se tre shtetasit e huaj që u arrestuan në shkurt, me mbi 1 milionë euro false, të jenë pjesë e ndonjë grupi që hedh në qarkullim kartëmonedhat e falsifikuara në vendin tonë.
/a.r
