Duket se protesta do të vazhdojë dhe bashkë me të edhe ngërçi. Në një kohë që kryeministri, Edi Rama kërkon dialog, studentët nuk heqin dorë nga protesta e tyre pa kompromis për plotësimin e kërkesave. Media ka dhënë planin e protestës për nesër, ku studentët pritet sërisht të bojkotojnë mësimin dhe të vazhdojnë marshimin e tyre nga fakultetet përkatëse drejt godinës së Kryeministrisë.
Problemi është se ende nuk po kristalizohen grupet organizuese dhe bashkë me të edhe atë që do të ndodhë në të ardhmen. Ka shumë vatra organizimi dhe duket se edhe vetë studentët nuk dinë se çfarë do procedojnë në këtë bllokim.
Si gjithnjë protesta e studentëve do të nisë në orën 9:00 të mëngjesit, ndërsa ende nuk dihet, nëse në ditën e 13-të protestës ata do ta kalojnë natën para godinës së Kryeministrisë, siç kanë vepruar edhe disa ditë rradhazi.
“Nesër, 17 dhjetor protesta vazhdon në Fakultete (9-11) dhe më pas para Kryeministrisë.
Në orën 9-11 organizohemi përpara fakulteteve për të ndërgjegjësuar çdonjërin nga ne mbi kauzën tonë të drejtë. Studentët të pajisur me foni do të shpalosin në detaje kërkesat e tyre specifike për arsim cilësor. Folës të ndryshëm nga të gjitha programet e studimit dalin dhe denoncojnë me forcë problemet tona, padrejtësinë që na bëhen përditë, të cilat duhet të marrin fund. Studentët artikulojne kërkesa specifike për autoritetet drejtuese të Fakulteteve/Universiteteve. Përfaqësues nga fakultete/Universitete të tjera përshëndesin protestën dhe prezantojnë problemet e përbashkëta”, shkruhet në njoftimin për protestën e ditës së 13-të.
