Presidenti i Ukrainës, Volodymyr Zelensky, ka njoftuar se vendi i tij po planifikon operacione të reja ushtarake brenda territorit të Rusisë, duke theksuar se përgatitjet janë në vazhdim.
“Nuk do të ndalemi – operacionet do të vazhdojnë ashtu siç duhet,” deklaroi Zelensky në platformën X, pas një takimi me komandantin e forcave të armatosura ukrainase, gjeneralin Oleksandr Syrskyi.
Sipas tij, forcat dhe resurset janë duke u mobilizuar për të ndërmarrë sulme të reja.
Prej disa muajsh, ushtria ukrainase ka intensifikuar përdorimin e dronëve për të goditur objektiva strategjike në Rusi, veçanërisht rafineritë e naftës, në përpjekje për të dëmtuar kapacitetet logjistike dhe ushtarake të Kremlinit.
Shpërthime të fuqishme raportohen pothuajse çdo ditë në zona të ndryshme të Rusisë, duke e bërë më të vështirë për trupat ruse të vazhdojnë ofensivën kundër Ukrainës.
