Kryetari i LZHK-së, Dashamir Shehi, në një lidhje direkte me “Dita jonë” në A2, theksoi se qeveria nuk po menaxhon situatën e krijuar nga koronavirusi, por thjesht po mban nën kontroll shifrat që publikon.
Edhe pse pranoi se qeveria “një farë merite e ka pasur” me masat e marra, Shehi shtoi: “Kushdo qeveri të ishte, njësoj do të vepronte. Por, ne nuk kemi kurbë akoma. Kemi një vijë të sheshtë që çdo ditë rrezikon të ngrihet. Ne nuk kemi një grafik normal si të gjitha vendet, ku kurba është ngritur dhe më pas është ulur.
Qeveria ka dashur të mbajë nën kontroll atmosferën përqark pandemisë. Janë bërë shumë pak tampone sepse qeveria është e pasigurtë për situatën. Qeveria po mban nën kontroll shifrat që publikon, jo situatën. Nuk ka për ta kontrolluar situatën derisa bëhen 150 tampone në ditë. Ne nuk e dimë tani nëse po zbresim apo po e ngjisim kodrën”.
Sipas Shehit, nëse qeveria nuk ndihmon aktivitetet prodhuese, rrezikojmë përsëritjen e vitit 1997.
“Duhen pompuar para’ në të gjitha aktivitetet prodhuese. Ajo pak ekonomi që ishte ndërtuar në këto 30 vite, nuk e përballon dot ndërprerjen e ekonomisë për 4 muaj.
Sepse do të ndërpritet zinxhiri ekonomik dhe nuk do të ofrohet mall në treg. Ato pak mallra do të kushtojnë shumë; do të ndërpritet zinxhiri fiskal, njerëzit nuk do të kenë se si të paguajnë taksat dhe energjinë.
Pas 5-6 muajsh nuk do të paguajë më njeri, arka do të jetë bosh, do të bëhet si në vitin 1997; ndërpritet zinxhiri profesional, largohen kuzhinierë dhe muratorë, duke lënë bosh tregun e punës”, tha Shehi.
