Dhjetëra shqiptarë të Kosovës të cilët jetojnë nëpër vende të ndryshme të Evropës janë bllokuar aktualisht brenda territorit serb. Në fakt bëhet fjalë për burokracitë që policia kufitare e Kosovës është duke iu vënë për shkak të sigurimeve. Bajrush Zogaj nga Zvicra i cili është duke ardhur në Kosovë ka telefonuar gazetën “Zëri” dhe i ka treguar për gjendjen e cila aktualisht po mbretëron atje. “Aktualisht jemi në territorin serb afër kufirit. Kolonat janë 10 apo 15 kilometra. Me aq sa morëm informacione deri më tani është se është pala kosovare ajo e cila ka bllokuar tejkalimin e veturave në territorin e Kosovës për shkaqe të sigurimit”, ka thënë Zogaj për zeri.info.
Ai u ka bërë thirrje autoritete kosovare që të merren më shpejt me këtë punë pasi që në mesin e qindra mërgimtarëve ka fëmijë e gra të cilët po presin me orë të tëra në të ftohtë. Ai ka shtuar se shumë familje tashmë i ka kapur edhe paniku dhe gjendja po bëhet alarmante.
