Paradokset e kushtetutës dhe shkeljet e saj!

Nga Fatmir Merkoçi*

Jemi në një situatë paradoksale dhe kjo si pasojë e abuzimit me detyrën nga vetë Kryeministri, i cili duket hapur se ka shkelur Kushtetutën. Akti-normativ i nxjerr nga qeveria me Nr. 243, datë 24.3.2020 për Shpalljen e Emergjencës Natyrore, nuk gjendet i botuar në Fletoren Zyrtare. Të jetë “harresë”?! Apo me këtë “harresë” Rama kërkon të bëhet i pa kontrollueshëm?!

Nën këtë vendim, qeveria Rama po merr masa drastike. Kjo nën pretekstin e Pandemisë që u shpall nga OBSH.

Por ashtu siç e kemi theksuar dhe më parë Kushtetuta jonë nuk ka nen specifik për Emergjencë Shëndetësore. Pra nuk është parashikuar një situatë e tillë, e cila do jepte dhe rastet se cilat nene të Kushtetutës duheshin kufizuar apo ndaluar.

Po le ti kthehemi Vendimit ku qeveria Rama del mbi atë çka lejon Kushtetuta. Në mbështetje të neneve 100, 170, 174, pika 1, e 175, pika 2 të Kushtetutës, shpall Gjendjen e Emergjencës. Në Nenin 175 pika 2 Kushtetuta thotë: – Gjatë gjendjes së fatkeqësisë natyrore mund të kufizohen të drejtat dhe liritë e parashikuara në nenet 37, 38, 41, pika 4, 49 dhe 51 të Kushtetutës. Pra kemi të bëjmë me KUFIZIM DHE JO NDALIM.

Por, të gjitha masat e marra nga Rama, janë masa ndaluese dhe jo kufizuese. Masa të cilat janë ekstremisht në shkelje të hapur të Kushtetutës. Në kushtet e një epidemie qoftë dhe COVID-19, Qeveria nuk mundet të mbyll një popull të tërë. Kjo për shumë arsye pasi: Nëse urdhëron mbylljen në shtëpi, duhet ti garantosh çdo shtetasi jetesën, ku hyn ushqimi i përditshëm dhe mjetet e higjienës.

Ti garantosh të ardhurat e munguara gjatë qëndrimit në shtëpi.

Ti garantosh ilaçet, dhe kontaktin me mjekun e familjes.

A i ka garantuar vallë qeveria Rama këto? Çdo kush e di që jo.

Por ana tjetër, duke mos u botuar në Fletoren Zyrtare vendimi Nr.243, datë 24.3.2020, automatikisht, çdo vendim apo urdhëresë që rrjedh prej saj është i pa ligjshëm. Si rrjedhojë janë dhe të pa zbatueshme.

Në kundërshtim me Kushtetutën, qeveria Rama vendos gjoba pikërisht mbi bazën e këtij vendim, për të gjithë ata që e shkelin këtë vendim të pa botuar. Lind pyetja: Po nesër Gjykata për këto gjoba, si do shprehet?

Po ajo që duket më e rëndë është fakti se askush nuk flet. Nuk flasin as ata që mbahen për konstitucionalistë. Nuk flet as Presidenti, jo vetëm për këto shkelje flagrante, por dhe kur del ushtria në rrugë, ku vetë Presidenti duhet të prononcohet se kush ka firmosur për daljen e ushtrisë në rrugë dhe arsyen se përse duhet të dalë.

Por nuk flet as opozita për këto shkelje dhe këtë terror që po e ushtron Rama në këtë situatë. Është e vërtetë se në një pandemi ka masa kufizuese por jo diktatoriale, ku vetë Rama deklaron dhe sa vite burg duhet të dënohen shqiptarët që nuk i binden urdhrit të tij të paligjshëm.

Rama ka hartuar një listë ku tregon se kush biznese lejohen, por nga ana tjetër popullin e mbyll në shtëpi. Kjo ndodh pasi Rama kërkon mos të zbatojë rregullat që janë në rastet e Pandemisë.

Qeveri Rama guxon të shkeli çdo të drejtë. Hapja e portaleve për të marr leje për të lëvizur do të thotë heqje e të drejtës dhe jo kufizim. Në vendet e tjera nuk është ndaluar lëvizja dhe nuk janë detyruar njerëzit as të ndërpresin punën dhe as të mos përdorin mjetet e tyre. Mos vallë ne jemi më të rrezikuarit e kësaj pandemie?

Qeveria duke përdorur propagandën ka shkelur privatësinë e çdo shtetasi, kuptohet duke parë dhe heshtjen e kundërshtarëve të vet politikë. Vazhdon të dhunojë çdo të drejtë. Kërkon që çdo shqiptar të jetë një “ kavje” në eksperimentin e tij të çuditshëm.

Rama shkon në delirin e tij. Ai lejon dhe ndalon thjesht sipas tekave të tij. Ai ndalon të kryesh punë. Portalet e tij duken se janë propagandë e pastër. Kjo pasi ato nuk të përgjigjen. Duke të ndaluar të kryesh punët. Përshembull, nëse dikush kërkon Avokat, ai nuk mundet të lëvizi. Pra të heq të drejtën e zgjedhjes së mbrojtjes. Atë që Kushtetuta ja njeh çdo shtetasi. Nëse ke një defekt elektrik, ti nuk mundesh të marrësh një elektriçist, hidraulik, marangoz, etj. Nuk mundesh të blesh asnjë ilaç, pasi të gjitha janë të mbyllura. Nuk merr asnjë shërbim për dhëmbët, apo dhe një incident që mundet të ndodh, nuk mund të shkosh për mjekim. Pra rastet e ndalimit janë totale. Prandaj them se: Kemi të bëjmë me shkelje të Kushtetutës.

Nesër Rama të gjitha këto shkelje do ti mbulojë me një kalim të ligjit në Kuvend. Në atë Kuvend që, siç e kam thënë është vetë i pa ligjshëm. Në atë Kuvend, do bëjë dhe miratimin e ndryshimit të Kodit Penal, ku do ti dënojë shqiptarët me BURG për shkelje të ligjit të pa ligjshëm të nxjerr nga vetë qeveria Rama.

Kjo nuk është Pandemi. Ky nuk është virus vrasës. Ky është një virus që çoi botën në çmenduri kolektive, duke i dhënë dorë të lirë Ramës të vendos diktaturë. Zoti i shpëtoftë shqiptarët!

*Avokat