Marrëveshja e “Paqes Fiskale”, e cila hyn në fuqi më 1 janar, parashikon anulimin e një pjese të borxheve tatimore dhe doganore, si dhe rivlerësimin preferencial të pasqyrave financiare.
Sipas ekspertëve, kjo nismë rrezikon të minojë progresin e arritur më herët në administrimin dhe përputhshmërinë tatimore.
Drejtori Ekzekutiv i Dhomës Amerikane të Tregtisë, Neritan Mullaj, vlerëson se ligji krijon një disbalancë mes tatimpaguesve të rregullt dhe subjekteve që kanë pasur probleme të vazhdueshme me shlyerjen e detyrimeve ndaj shtetit.
“Nuk ofrohen garanci të plota që nuk do të ketë para të padeklaruara, para me burime të paidentifikueshme, sepse nuk ka detyrim dhe kritere përkatëse që do të përcaktonin qartë se nga do të vinin këto para,” u shpreh Mullaj.
Sipas tij, afatet e përcaktuara për përmbylljen e aplikimeve lënë hapësirë për subjektivizëm në zbatimin e ligjit.
“Marrëveshja që do të bëhet për këtë aplikim mund të lejojë edhe një shtyrje rreth 2 vjet, dhe kjo krijon mundësi subjektivizimi dhe abuzimi, në varësi të marrëdhënies që do të ketë administrata tatimore me subjektin përkatës,” shtoi ai.
Një tjetër shqetësim i ngritur nga Dhoma Amerikane lidhet me nevojën për praktika të qarta, të unifikuara dhe të qëndrueshme në raport me tatimpaguesit.
Sipas Mullajt, iniciativa të tilla nuk kontribuojnë në ndërtimin e një klime besimi afatgjatë, as për investitorët e huaj dhe as për publikun, duke rritur pasigurinë rregullatore në ekonomi.
Nga ana tjetër, qeveria deklaron se nga ky projektligj pritet të përfitojnë rreth 207 mijë biznese, ndërsa vlera totale e borxheve tatimore dhe doganore që do të përfshihen në këtë skemë lehtësuese arrin në rreth 211 miliardë lekë, ose afërsisht 2.1 miliardë euro. RTSH
