Papa Leo XIV ka marrë pjesë këtë të mërkurë në eventin “Kantiku i Paqes” në Castel Gandolfo, rezidencën verore të Papës jashtë Romës, ku është thelluar në historinë e familjes së tij, duke zbuluar se prejardhja e tij përfshinte si skllevër ashtu edhe skllavo-pronarë.
“Unë vij nga një familje ku gjyshërit e mi ishin emigrantë, nga ana e nënës sime, kemi njerëz që ishin si skllevër ashtu edhe pronarë skllevërish”, u shpreh ai.
Leo gjithashtu, foli për lidhjet historike të familjes së tij me tregtinë transatlantike të skllevërve, në përgjigje të pyetjes së një gazetari në lidhje me trashëgiminë e tij amerikane.
I pyetur se çfarë i pëlqen te atdheu i tij, ai tha se e vlerëson shumë “ndjenjën e lirisë, ndjenjën e mundësisë” të Shteteve të Bashkuara dhe “të ftesës për breza me radhë për njerëz nga e gjithë bota që të jenë pjesë e Amerikës”.
Rëndësia e mirëpritjes së të sapoardhurve është një mesazh që Papa i lindur në Çikago ia ka dërguar vazhdimisht SHBA-së , pasi ka kritikuar trajtimin “çnjerëzor” të emigrantëve gjatë masave të ashpra të administratës Trump.
Vërejtjet e Leos mbi historinë e familjes së tij vijnë pasi një studim zbuloi se ai kishte një përzierje paraardhësish evropianë dhe afrikano-amerikanë. Gjyshërit e tij nga nëna, banorë të New Orleans, përshkruhen në të dhënat e regjistrimit të popullsisë si “të zinj” dhe “mulatë”. Studimi, i kryer nga studiuesi Henry Louis Gates Jr., zbuloi gjithashtu se paraardhësit e Papës përfshinin si skllavo-pronar ashtu edhe skllevër.
Më herët këtë vit, Leo bëri histori duke u bërë papa i parë që pranoi publikisht dhe kërkoi falje për rolin e Kishës Katolike në skllavëri.
“E pamundur të mos ndjesh keqardhje të thellë kur mendon për vuajtjet dhe poshtërimin e jashtëzakonshëm që kanë përjetuar kaq shumë njerëz”, është shprehur ai.
