Papa Françesku mirëpriti Dom Ernest Simonin, priftin shqiptar që kaloi 28 vite në burg.
Sipas të përditshmes La Stampa, Papa i puthi duart priftit shqiptar.
Kur ishte në Shqipëri më 21 shtator të vitit 2014, Papa u prek nga rrëfimi i Simonit për kohën e kaluar në burg dhe e përqafoi priftin shqiptar.
Gazetari Mimmo Muolo, që shkruan për gazetën katolike italiane, Avvenire, tha se Dom Ernesti ka kaluar 11 mijë ditë tortura dhe punë të detyruar.
Muolo ka shkruar librin për Dom Ernest Simonin.
Prifti i dorëzoi personalisht Papës librin.
“Përndjekja ime nisi në vigjilje të Krishtlindjeve, në vitin 1963, kur u arrestova dhe më futën në birucë, më torturuan dhe më dënuan me vdekje thjesht sepse isha prift”.
Shokut të qelisë i kishin thënë të regjistronte të gjithë zemërimin e priftit kundër regjimit, por Dom Ernesti nuk kishte gjë tjetër veç lutjeve dhe faljeve për persekutorët e tij.
Dënimi i tij u reduktua me 25 vite punë të detyrueshme në minierat dhe kanalet e ujërave të zeza në Shkodër.
“Kur isha në burg, thosha meshën në latinisht në mendje”, kujton ai.
Dom Ernesti u lirua më 5 shtator të vitit 1990. Ai rifilloi menjëherë veprimtarinë si prift. Gjëja e parë që bëri ishte konfirmimi i faljes ndaj përndjekësve të tij.
“Unë vazhdimisht kërkoj dëshirën e Zotit mbi ta,” thotë ai.
Kur e pyet se si arriti të durojë një përndjekje të tillë, ai buzëqesh dhe zbulon sekretin e tij: “Nuk kam bërë asgjë të jashtëzakonshme në të vërtetë, gjithmonë i lutesha Jezusit dhe gjithmonë flisja me Jezusin”.
