Çmimet e naftës në Shtetet e Bashkuara kanë arritur nivelin më të lartë historik, duke rënduar më tej kostot për shoferët dhe bizneset amerikane.
Sipas Shoqatës Amerikane të Automobilave (AAA), çmimi mesatar i një galoni nafte ka shkuar në 5.85 dollarë, nga 3.71 dollarë një vit më parë. Rritja e çmimeve ka ardhur pas përshkallëzimit të konfliktit me Iranin dhe rritjes së çmimeve të naftës në tregjet me shumicë.
Një gallon amerikan është i barabartë me rreth 3.785 litra. Kjo do të thotë se me çmimin prej 5.85 dollarësh për gallon, një litër naftë në SHBA kushton mesatarisht rreth 1.55 dollarë.
Ndërkohë, në Shqipëri çmimi i naftës është 220 lekë për litër, ose afërsisht 2.80 dollarë për litër. E përllogaritur me gallon, kjo do të thotë se e njëjta sasi prej 3.785 litrash kushton në Shqipëri rreth 10.60 dollarë, kundrejt 5.85 dollarëve në SHBA.
Pra, pavarësisht se në Shtetet e Bashkuara çmimi i naftës konsiderohet në nivele rekord, sipas këtyre shifrave një litër naftë në Shqipëri kushton rreth 81% më shtrenjtë se në SHBA.
Nafta përdoret kryesisht nga automjetet komerciale, përfshirë kamionët, trenat, anijet, autobusët, si dhe makineritë bujqësore dhe të ndërtimit.
Një faktor i rëndësishëm është edhe situata në Ngushticën e Hormuzit, përmes së cilës transportohet rreth një e pesta e naftës në botë. Kufizimet e furnizimit kanë shtuar presionin mbi tregjet globale të energjisë.
Ndërkohë, presidenti Donald Trump ka premtuar uljen e çmimeve të karburantit për amerikanët, duke u mbështetur edhe te një marrëveshje e re për zhvillimin e sektorit të naftës në Venezuelë.
Edhe çmimi i benzinës në SHBA është rritur ndjeshëm, duke arritur mesatarisht në 4.15 dollarë për gallon, nga 3.20 dollarë një vit më parë.
