Ministri i Bujqësisë Edmond Panariti dha një deklaratë të fortë në lidhje me marrëdhëniet e vështira sa i takon shkëmbimeve tregtare Shqipëri-Maqedoni.
Sipas tij, prodhimet bujqësore shqiptare po bllokohen nga pala maqedonase në pikën kufitare të Bllacës, me argumentin e certifikatave jo të rregullta fitosanitare. Kjo u deklarua ndërsa ministrat e Europës Juglindore janë mbledhur në Tiranë për forcimin e bashkëpunimit rajonal.
Sipas Panaritit, kjo është një situatë e përsëritur nga autoritetet doganore të shtetit fqinj, si pasojë e së cilës janë penalizuar prodhuesit shqiptarë dhe asnjëherë nuk janë marrë masat e duhura.
Ministri Panariti, në konferencën e organizuar nga sekretari i përgjithshëm i Grupit për Zhvillimin Rural Regjonal Boban Iliç, theksoi se kjo është “luftë tregtare” e vërtetë, që nuk duhet të ndodhë më.
Ministri Edmond Panariti drejtoi takimin e 9të të ministrave të Bujqësisë së rajonit, pasi Shqipëria mori edhe Presidencën e radhës të Grupit për Zhvillimin Rural Regjonal.
Fokusi i saj ishte bashkëpunimi për interesin e përbashkët të anëtarësimit në Bashkimin Europian.
