Një ngjarje e rëndë kriminale ka ndodhur në Ankara e cila mund të marrë përmasa të një incidenti diplomatik.
Ambasadori rus në Turqi Andrey Karlov ka mbetur i plagosur me armë zjarri pasi ra viktimë e një atentati, por pak minuta më vonë ai humbi jetën në spital.
Ngjarja ndodhi në Ankara gjatë një ekspozite fotografike në kryeqytetin turk raporton Rusia Today.
Në videon e mëposhtme shfaqen momentet e rënda kur hapet zjarr ndaj ambasadorit i cili ishte duke mbajtur një fjalim. Pas të shtënave ambasadori rrëzohet në tokë.
Karlov po përgatitej të mbante fjalimin e tij në ekspozitën “Rusia në sytë e turqve”, kur një person i armatosur u afrua dhe hapi zjarr ndaj tij.
Të shtënat u dëgjuan pas një të bërtiture të madhe “dilni jashtë”. Sipas informatave jozyrtare, sulmuesi thërriti: “kjo është për Aleppon!” dhe hapi zjarr.
Mediat vendase raportojnë se në ngjarje mbetën të plagosur edhe 3 persona të tjerë.
Autoritetet e sigurisë rrethuan godinën ku ndodhi atentati dhe u vënë në kërkim të personit që hapi zjarr ndaj ambasadorit.
Ndërkohë disa media vendase rapretojnë se pak minuta pas atentatit ndaj ambasadorit autori u ekzekutua nga policia.
Atentati i sotëm vjen në një kohë kur në Turqi janë zhvilluar protesta kundër rolit që po mban Rusia në konfliktin sirian.
/a.m.
Fotoja e ambasadorit pak çaste para se të sumohej me armë.
