Pas interesimit të medias për një qëndrim zyrtar të PD-së në lidhje me deklaratën ekstreme të Berishës, kreu i grupit parlamentar Edi Paloka është shprehur se nëse ish kryeministri sjell një projekligj për armët, atëherë do të jetë grupi i selisë blu ai i cili do të vendosë. Por nga ana tjetër, Paloka ka shtuar se nëse vitin e ardhshëm në zgjedhjet parlamentare, Rama guxon të prekë votat, atëherë veprimet e opozitës nuk do të jenë brenda kuadrit ligjor.
“Ajo që tha Berisha e ngritur ne kontekstin e asaj që po ndodh në Shqipëri është mëse reale, sepse praktikisht qytetarët janë krejtësisht të pambrojtur jo vetëm nga bandat e krimit por edhe përballë një qeverie që është po aq kriminale sa bandat që e mbajnë në këmbë. Cështja pastaj që a do të vijë apo jo një projektligj i tillë sigurisht diskutohet në mbledhje të grupit, zoti Berisha mund ta sjellë aty dhe të diskutohet dhe të sillet në rruge ligjore. Gjithmonë vendimet i merr grupi nëse do ketë iniciativë ligjore. Por e përsëris dhe theksoj se situata është e atillë që shqiptarët kanë nevojë për vetëmbrojtje.
Por për ti shtuar diçka dhe nga unë zotit Rama meqë u përpoq të ngrite një zhurmë dje për të mbuluar kapjen e tij prej shullazve, duhet të ketë parasysh një gjë se nëse do guxojë nesër të prekë votën e lirë të shqiptarëve, nëse e mendon se siç bëri në zgjedhjet në partinë e tij apo universitete me banditë për të grabitur voten, ne do të reagojmë në një mënyrë jo aq të ligjshme” tha ai.
