Kryetari i Grupit Parlamentar të Partisë Demokratike, Edi Paloka, hedh poshtë aludimet e ish-deputetes demokrate, Mesila Doda se është vetë ai që e ka përjashtuar nga partia për shkak të votimit në Kuvend pro arrestimit të deputetit Tom Doshi.
Në një reagim për “Gazeta Shqiptare”, Paloka shprehet se Doda ka ikur prej kohësh nga Partia Demokratike, ndërsa ironizoi se ikja e saj e ditëve të fundit mund të jetë nga Partia për Drejtësi Integrim dhe Unitet tek Lëvizja Socialiste për Integrim.
“Mesila Doda ndoshta ka ikur dje nga grupi parlamentar i PDIU-së tek grupi parlamentar i LSI-së sepse nga grupi parlamentar i Partisë Demokratike ka kohë që ka ikur”, – deklaroi Paloka.
Deputetja Mesila Doda, dy ditë më parë, përmes një letre të hapur nën titullin “Post Factum” deklaroi largimin nga Partia Demokratike. Duke renditur arsyet e ndarjes me PD-në, partinë që siç shprehej e krijoi bashkë me studentët e pedagogët 25 vite më parë, Doda pretendonte se thyerja me PD kishte nisur që nga anatemimi i qëndrimeve të saj për çështje të rëndësishme, si armët kimike, dekriminalizimi me çdo kusht i Kuvendit, refuzimi i bojkotit apo çuarja përpara e procesit për hapjen e dosjeve.
