Zv.ndihmës Sekretari Amerikan i Shtetit ka përsëritur qëndrimin e Uashingtonit sa i përket zhvillimeve politike në Shqipëri.
Matthew Palmer tha sot në një takim me gazetarët se Shqipëria ka një qeveri legjitime.
Ai u shpreh se opozita ka përgjegjësi të marrë pjesë në zgjedhjet e qershorit 2019.
“Jam i sigurt se kjo qeveri do ta çojë vendin tuaj përpara dhe se do të vijojë rrugën e reformave. Unë i inkurajoj të gjitha partitë që të marrin pjesë në zgjedhjet e qershorit. Sa i përket ndikimit rus, dua t’ju them se Shqipëria është një target i vështirë për Moskën” – mësohet të ketë thënë Palmer ndër të tjera.
Zyrtari i lartë i DASH u shpreh se nuk është në Tiranë për të negociuar krizën politike, por tha se djegia e mandateve nuk është zgjidhje.
“Nuk është zgjidhje djegia e mandateve nga opozita, duhet të gjeje një mënyrë për të marre pjesë në zgjedhje. Do të ishte fatkeqësi nëse opozita nuk do të merrte pjesë në këtë proces demokratik. Përgjegjësi e opozitës është të marrë pjesë në zgjedhjet e qershorit dhe të ndaj vizionin e saj me mbështëtësit dhe të punoje fort për t’i fituar zgjedhjet” – shtoi ai.
Sa i përket lobimit të Partisë Demokratike në SHBA, zyrtari i lartë tha se çështja është nën hetim dhe se nuk mund të jepte shumë detaje, por se në një vend demokratik lobimi është legjitim dhe proces normal për sa kohë është brenda transparencës.
Zëvendës Ndihmës Sekretari i Shtetit për Evropën Matthew Palmer ndodhet në Tiranë prej ditës së djeshme ku u takua me kryeministrin Edi Rama ndërsa sot do të vijojë takimet me Presidentin Ilir Meta dhe drejtuesë të opozitës.
/a.rada
