Mëngjesin e sotëm, në kalatën 5 të Portit të Durrësit është ndalur për herë të parë kroçiera luksoze “Seven Seas Grandeur”, shkruan A2 CNN. Anija turistike mban në bord 728 vizitorë nga vende të ndryshme të botës, kryesisht nga SHBA (555 pasagjerë), si dhe nga Kanadaja, Mbretëria e Bashkuar, Australia, Brazili, Gjermania, Spanja, Japonia dhe vende të tjera.
Ky fluks pasagjerësh konfirmon se Durrësi është një nga destinacionet më tërheqëse të itinerareve mesdhetare për kroçierat ndërkombëtare. Për më tepër, prania e vizitorëve gjatë muajve të vjeshtës dëshmon se sezoni turistik në Durrës nuk përfundon me verën dhe se turizmi detar po shndërrohet në një trend gjithëvjetor, duke promovuar vendin tonë si destinacion gjithëvjetor për vizitorët e huaj.
Pas ndalesës në Durrës kroçiera do të vijojë lundrimin drejt Kotorrit në Mal i Zi.
