Bashkia e Tiranës brenda muajit dhjetor do të nisë dhënien e çertifikatave të pronësisë për pallatet që nuk janë të hipotekuar. Kryetari i Bashkisë Erion Veliaj është shprehur se marrja e hipotekave do të nisë gjatë këtij muaji, ndërsa para përfundimit të mandatit të tij, do të jepen hipotekat për rreth 300 pallate.
“Në një vend që janë shkelur kushtet e lejes, në një vend ku deklarohet se pallati do ketë ashensor dhe nuk e ka një të tillë, në momentin që keni në kontratë një vend parkimi dhe pallati s’ka pikë parkimi, atëherë dikush po gënjen. Megjithatë unë nuk jam qaraman, do t’i japë zgjidhje këtij promblemi. Brenda këtij mandati do të hipotekohen 300 pallate, ndërsa hipotekat e para do të jepen gjatë muajit dhjetor. Është një problem që prek mbi 20 mijë banorë”, – u shpreh Veliaj pas Uorkshopit për “Implementimin e funksioneve të decentralizuara në kuadër të organizimit të ri territorial”.
Ndërkohë Bashkia e Tiranës thotë se hipotekat do jenë gati në ditët në vazhdim, për pallatet të cilat kanë aplikuar të parët.
Në shkrimin e mëposhtëm, ‘Shqiptarja.com’ sqaron prcedurat ndërsa bashkia cila thekson se në këtë proces do të përfshihen të gjitha pallatet, edhe në rastet kur ndërtuesit kanë falimentuar, por edhe nëse ata nuk kanë aplikuar për hipotekë. Brenda dhjetorit pritet të jepen hipotekat për 2 pallate në kryeqytet.
Lejet e ndërtimit
Pranë Kopshtit Botanik, nuk do të jepen më leje ndërtimi. Bashkia ka vendosur që në këtë zonë të pezullohen totalisht ndëtimet, për shkak të rrezikut që shfaqet për rrëshkitjet e dherave. Aktualisht një pallat pranë Kopështit Botanik rrezikon të shembet pasi është hapur një gropë për të ndërtuar 7 kate, ndërkohë që leja e ndërtimit ishte për vetëm 3 kate.
“Për lejet që u dhanë në Farkë, lejet jepeshin për shesh, potencialisht për tre kate, bëhej gropa për shtatë kate dhe po merr edhe pallatet e tjera. Pjesën më të madhe të kohës e kalojnë me menaxhim dëmi të shkaktuar më parë nga një bashki e papërgjegjshme dhe leje ndërtimi të dhëna pa kriter. Po japim zgjidhje në Farkë duke vendosur pilota dhe pezulluar totalisht ndërtimet në Kopshtin Botanik, por edhe një arsye pse të gjithë administratorët duhet të inspektojnë me kujdes zonën e tyre që “gjëma” të tilla të mos presim të na i zbulojë shiu i radhës”, – tha Erion Veliaj.
Pallati
Sipas Veliajt, qytetet po bëhen më të pasigurta, nga gabimet që kanë bërë pasardhësit, duke ju referuar shtyrjes së lejes të një pallati 16-katësh pranë shtëpisë së shkrimtarit Ismail Kadare, vetëm 6 ditë para se ai të bënte betimin. “Ishin dhënë shtesa leje ndërtimi në Tiranë, në mes të Tiranës, pallate pa garazh dhe asnjë standard. Bota e qytetet ku jetojmë po bëhen gjithnjë e më të pasigurta prej gabimeve që kanë bërë njerëzit para nesh”, – theksoi Veliaj.
Veliaj, Kritika qeverisë: Buxheti lë për të dëshiruar
Shpërndarja e fondeve për bashkisë, sipas Erion Veliajt nuk është bërë në mënyrë e duhur. Veliaj ka kritikuar qeverinë, duke thënë se fondi për transfertëne kushtëzuar për Bashkinë e Tiranës, duhet të jetë më i lartë dhe jo më i ulët se bashkitë e tjera.
“Duhet të pranojmë se buxheti i bashkive ende lë për të dëshiruar. Nëse kemi bashki të mëdha si Tirana që gjeneron 50 % të ekonomisë së vendit, nuk mund të marrë vetëm 10% të grantit të kushtëzuar. Aty ku jeton dhe ofrohen shërbime për 1/3 e popullsisë, nuk them të jetë 1/3 e grantit, por nuk mund të jetë as 1/10, sepse trysnia e Tiranës për të ofruar shërbime nuk është vetëm lokale. Nëse paratë janë të njerëzve, le të vendosin njerëzit të thonë se ku duan t’i shpenzojnë paratë. Kjo është në praktikë që duam ta inkurajojmë”, – u shpreh Veliaj.
Sipas tij kur buxheti ndahet keq “është koha për bashkim”, duke iu referuar këtu të majtëve dhe të djathtëve në bashki. Kryebashkiaku bëri apel që të shikohet pjesa e ndarjmes së fondit, duke qënë se Bashkia e Tiranës pret qytetarët nga e gjithë Shqipëria.
