Ministrja për Marrëdhëniet me Parlamentin, Elisa Spiropali bashkë me ministren e Drejtësisë Etilda Gjonaj, çelën me Fakultetin e Drejtësisë ciklin e bashkëbisedimeve me studentë dhe pedagogë, mbi ecurinë e Paktit për Universitetin.
Gjatë këtij takimi pasditen e së hënës, në ambientet e COD-it në Kryeministri, Spiropali u shpreh se, qeveria u angazhua seriozisht për realizimin e kërkesave të studentëve, madje duke çuar më tej procesin për arritjen e standardeve në mjediset e kampuseve universitare dhe rritjen e eficiencës në universitete.
Spiropali theksoi se, universitetet duhet të rrisin performancën e tyre akademike për titujt shkencorë si dhe të tregohen të përgjegjshme për punësimet e pedagogëve.
“Mbaj mend një nga sloganet e studentëve, i cili mbahej nga tri vajza ku shkruhej: “U munduat të na varrosnit, por harruat që ne jemi fara”. Ne ju themi se po përpiqemi të mbjellim një farë më të mirë. Është e rëndësishme të flasim edhe për pagesat. Për ne dija nuk është privilegj, por një e drejtë për të gjithë. Ju keni meritën parësore që u ngritët, por natyrisht edhe qeveria që ju dëgjoi”.
Spiropali u ndal në projektet që ka realizuar qeveria në mbështetje të studentëve.
“Krijimi në një kohë rekord i bibliotekës dixhitale për studentët, që u përurua sot, i vjen në ndihmë studentëve me literatura dhe libra, në një kohë kur në universitete ka ende mungesë të librave. Janë mbi 50 mijë tituj librash që studentët do të kenë akses në këtë bibliotekë, megjithëse kemi ende shumë punë për të bërë, por cilësia e dijes që studentët tanë marrin të jetë në nivelin e vendeve perëndimore, pasi me rajonin jemi deri diku aty”, -tha ajo.
Ndërsa theksoi se, mbi 10 mijë studentë përfitojnë nga bursat e reja dhe kushtet e reja financiare për të cilat ju keni meritën parësore që u ngritët, por edhe qeveria që arriti ta vendosë këtë komunikim dhe të reagojë në kohë për këtë nevojë.
Një tjetër çështje, vijoi ajo, atë të titujve akademikë, “ne nuk jemi aty për të qenë xhandari i cilësisë akademike, nuk e bën dot këtë asnjë qeveri, por ama ne mund të sigurohemi që Universiteti ta marrë këtë përgjegjësi dhe ta ketë detyrë. Universiteti duhet ta marrë këtë përgjegjësi që është e tij dhe drejtimi i universitetit duhet të jetë në lartësinë e detyrës që i cakton ligji, por edhe morali përballë studentëve”, – tha ajo.
Spiropali shpegoi për audiencën e pranishme, se qeveria ka marrë disa nisma që ndoshta në një vend me administrimin normal të universiteteve, do të duhet që t’i bënte universiteti bashkë me rektoratin. “Por duke qenë të vetëdijshëm që studentët protestonin dhe besonin tek kjo qeveri që mund të ndryshonte gjithçka në raport me universitetin, ne patjetër që u detyruam të vendosnim edhe disa standarde. Por e theksoj, që është përgjegjësi e universitetit që të vendosi një standard me titujt me punësimin e pedagogëve që universiteti të mos jetë një vend për të parkuar familjarët e njerëzve me pushtet, por vendi ku njerëzit me dije janë aty për t’ua ofruar dijen e tyre studentëve”, – tha ajo.
Spiropali theksoi se, “Pakti për Universitetin është i gjerë. Ku një ndër pikat është edhe punësimi i studentëve. Janë 373 studentë ekselentë që janë punësuar në institucione shtetërore në administratë përmes një programi të hapur. Ndërkohë që janë edhe 500 vende të hapura që presin aplikime dhe ne këtë program do ta vazhdojmë edhe në diplomaci. Jemi të vendosur që këtë komunikim dhe këtë produkt real ta çojmë edhe më tej, duke komunikuar me secilin fakultet, një më një, dhe jo më kot jemi sot me ju”.
/a.rada
