Në paketën fiskale të vitit 2016 që është prezantuar në Këshillin Ekonomik Kombëtar para disa ditësh është propozuar të hiqet dorë nga rritja e akcizës më 20 lekë për paketë nga 1 janari i vitit që vjen. Në fund të vitit që shkoi qeveria miratoi një ligj për akcizën në Kuvend ku programoi të rriste taksimin me 10 lekë për paketë në periudhën 2015-2017 si një masë në mbështetje të luftës antiduhan. Por rënia progresive e importeve të cigareve qysh kur nisi rrita e akcizës duket se, është shoqëruar me rritje të kontrabandës duke ndikuar negativisht në të ardhurat e buxhetore.
Grosistët në tregun e cigareve pohuan se, i kishin propozuar Ministrisë së Financave se, rritja e akcizës së cigares do të jetë e dështuar nëse kjo nuk shoqërohet me një përmirësim të të ardhurave të konsumatorëve.
Rritja e akcizës në vendin tonë ka qenë graduale ndër vite. Kështu, nga 40 lekë/ paketa u kalua në 50 lekë/ paketa (viti 2006) dhe nga 50 lekë/ paketa u kalua në 70 lekë paketa (viti 2010). “Rritja e akcizës së të tilla produkteve shoqërohet me rritjen e kontrabandës, fenomen ky që shoqëron gjithnjë të tilla produkte”, argumentoi ministria e Financave vitin që shkoi kur propozoi rritjen trevjeçare të akcizës.
Për këtë arsye vjet në Kuvend u miratua që rritja e akcizës së cigares të bëhet në mënyrë progresive me rritje 20 lekë/paketa në vitin 2014 dhe me rritje 10 lekë/paketa në vitet në vijim, deri sa të arrihet në standardin e BE-së, sipas progresivitetit të mëposhtëm:
4500 lekë/1000 copë, në 1 janar 2014;
5000 lekë/1000copë, në 1 janar 2015;
5500 lekë/1000 copë, në 1 janar 2016;
6000 lekë/1000 copë, në 1 janar 2017.
Por këtë vit qeveria ka vendosur të heqë dorë nga këto afate për ta shtyrë rritjen e akcizës për cigaret në një periudhë më të mëvonshme.
Monitor/
