Komisioni i reformës në drejtësi tashmë e mbylli misionin e tij, të enjten që shkoi, por do të jetë Komisioni parlamentar i Ligjeve që do të shqyrtojë rreth 40 projektligje që i përkasin fazës së tretë të reformës në drejtësi.
Tashmë puna ka nisur prej ditësh me projektligjet e para, siç janë: ligji organik për Presidentin, ligji antimafia apo ai “Për masat kundër financimit të terrorizmit”. Ligjet e paketës së dytë të reformës në drejtësi do të vijojnë në janar të diskutohen dhe të miratohen në Kuvend për të plotësuar të gjithë bazën ligjore që duhet për funksionimin e të gjitha institucioneve që lidhen me sistemin e drejtësisë. Ashtu si edhe në fazën e parë, atë të shqyrtimit e të miratimit të 7 ligjeve gjithçka u bë me ndihmën e ekspertëve ndërkombëtarë të Euralius dhe OPDAT, edhe në këtë fazë projektet janë hartuar në bashkëpunim me këta ekspertë.
Projektet janë tashmë në Kuvend dhe pritet që të nisin një e nga një. Nuk është përcaktuar ndonjë datë fikse për përfundimin e gjithë paketës së dytë, por është një punë edhe më e madhe përpara, ndërkohë që paralelisht do të nisë edhe zbatimi i vetingut. Edhe në Komisionin e Ligjeve do të jetë kryetari Fatmir Xhafaj që do të drejtojë punën për shqyrtimin e ligjeve.
Paketa e ligjeve është e ndarë në 7 paketa të tjera më të vogla. E para në radhë vjen paketa e ndryshimeve kushtetuese, e cila prek amendamente kushtetuese për sistemin e drejtësisë, amendimet kushtetuese për çështjet e tjera (BE,NATO, Dekriminalizimi etj.), ligjin për Gjykatën Kushtetuese, ligjin organik për Presidentin apo edhe ligjin për referendumet.
Tashmë Kuvendi e miratoi paketën e ndryshimeve kushtetuese, por pritet të disku- Darina Tanushi tojë të tjera çështja që kanë lidhje me ligjet organike që rregullojnë veprimtarinë e disa institucioneve. Në përmbushje të objektivit (fazës) të tretë, grupi i ekspertëve të nivelit të lartë me asistencën e sekretariatit teknik, bazuar në gjetjet e Dokumentit të Analizës së Sistemit (të përgatitur gjatë fazës së parë) dhe në zbatim të objektivave të Dokumentit Strategjik (të përgatitur gjatë fazës së dytë) ka hartuar paketën e projektligjeve të nevojshme për reformimin e sistemit të drejtësisë.
Edhe ky proces synohet nga maxhoranca të jetë gjithëpërfshirës, me kontributin dhe mbështetjen e institucioneve të sistemit të drejtësisë, ekspertëve vendas, partnerëve ndërkombëtarë, subjekteve të tjera të interesuara dhe opinionit publik. Reforma në drejtësi ka përmbyllur tashmë dy fazat e para të saj.
Analiza e Sistemit të Drejtësisë në Shqipëri, që përbën dhe fazën e parë, është një dokument me rreth 450 faqe, i pari i këtij lloji në 25 vjet, i cili pasqyron në mënyrë të plotë një analizë të hollësishme mbi sistemin e drejtësisë në vendin tonë. Ndërsa faza e dytë lidhet me Strategjinë për Reformimin e Drejtësisë dhe Planin e Veprimit për zhvillimin e saj.
Ky dokument synon t’u japë zgjidhje gjetjeve, problematikave dhe përfundimeve të identifikuara në dokumentin e analizës së sistemit të drejtësisë, përmes ndërhyrjeve kushtetuese e ligjore që duhen kryer në këtë drejtim. Reforma në drejtësi është konsideruar një kusht kyç për integrimin në Bashkimin Europian.
Madje në raportin e fundit të BE-së për Shqipërinë është theksuar veçanërisht se hapja e negociatave do të varet nga rezultatet konkrete që do të vihen re në zbatimin e reformës në drejtësi. Kryesori që është vlerësuar nga BE është procesi i vetingut, ose i kontrollit e verifikimit të gjyqtarëve e prokurorëve, përgatiti ”Gazeta Shqiptare”. (b.an)
