Qytetarët, bankat apo bizneset tarifat për përmbaruesit shtetërorë dhe privatë do t’i paguajnë në dy pjesë.
Metodologjia e ndarjes së tarifës do të jetë e veçantë për nga lloji i shërbimit, por risia do të jetë se përmbaruesve nuk do t’u paguhet kësti i dytë, nëse nuk çojnë deri në fund ekzekutimin e vendimit.
Komisioni i Ekonomisë miratoi dje ndryshimet e draftit “Për organizimin dhe funksionimin e shërbimit të përmbarimit gjyqësor.
Ministri i Drejtësisë, Ylli Manjani, shpjegoi se ndarja e tarifës në dy pjesë do të nxisë përmbaruesit të çojnë deri në fund ekzekutimin e vendimeve të gjykatave.
“Ajo që ndodh rëndom në treg pas futjes së përmbaruesve privatë është se përmbaruesi merr tarifën dhe nuk ekzekuton vendimin. Ky është problemi që duhet të zgjidhim dhe e vetmja mënyrë që vendimi i gjykatës të zbatohet, është që përmbaruesi të ketë motiv të marrë lekët e tij. Mënyra për ta bërë këtë aktiv, është që tarifa të ndahet. Në ndarje do të përfshihet tarifa e suksesit. Kjo është një formulë.
Banka Botërore ka kohë që e sugjeron për ta përdorur në praktikat tona. Tarifa bazë, që do të jetë për shërbimet bazë, përfshin kostot e fillimit të procedurave të ekzekutimit.
Dhe në momentin që përfundon ekzekutimi i detyrimet, do të llogaritet edhe tarifa e suksesit, por vetëm pasi të jetë ekzekutuar vendimi. Vendimi i Gjykatës apo titulli ekzekutiv është për t’u zbatuar dhe pikë! Në parim, ne kërkojmë të forcojmë pozitat e përmbarimit, ta vendosim në pozita konkurrence dhe jo që rri në zyrë dhe pret. Mos ta lëmë në pozita dembele. Më të goditurat nga shërbimi përmbarimor dembel janë bankat”, shpjegoi Manjani.
Deputeti i opozitës, Sherefedin Shehu, u shpreh skeptik që ndarja e tarifës do të sillte ekzekutimin e vendimit, duke qenë se situata flet për dosje të paekzekutuara.
Në përgjigje të shqetësimit, Manjani theksoi edhe një herë se ristrukturimi i tarifës nxit shpejtimin e punës së përmbaruesve.
Panorama/d.i.
