Pagat e mësuesve, Ahmetaj: Fondet për çdo kategori  

“Me mësuesit ndamë lajmin e mirë se pagat në sistemin arsimor do të rriten mesatarisht me 10% në 2017-ën. Është më shumë se një rritje pagash; është mirënjohje dhe shpërblim për sakrificën e reformave të vështira që qytetarët shqiptarë mbështetën përgjatë tri viteve, të domosdoshme për të ndërtuar terrenin ekonomik që sot na mundëson rritjen e pagave dhe pensioneve”, thuhet në njoftimin e Ministrisë së Financave në “Facebook”.

RRITJA E PAGËS
Prej 1 marsit të vitit 2017, rreth 35 mijë mësues në vend do të përfitojnë rritje pagash me 10%. Ministri i Financave, Arben Ahmetaj dy ditë më parë në një takim më mësuesit theksoi se, “kjo nuk është rritje page, por reformë në administratën publike, reformë e drejtpërdrejtë në sistemin e arsimit”. “Rritja do jetë 10% dhe për herë të parë në 7-8 vite do kalojnë në rritje reale. Në 2017-ën kërcejmë në inflacionin akumulativ me 2% plus”, – tha ministri Ahmetaj. Ndërsa, sa i përket rritjes së pagës për pedagogët, kryeministri Rama tha se, nga rritja do të përfitojnë jo vetëm mësuesit, por edhe pedagogët, ku për ta do shpenzohen rreth 5 milionë dollarë.“Rritja e rrogës që ne kemi projektuar, duke filluar, besoj, nga 1 marsi i vitit tjetër, është rritje reale mbi inflacionin e parashikuar, pra rritje e drejtpërdrejtë e fuqisë suaj blerëse. Konkretisht është një rritje prej së cilës përfitojnë 34.630 punonjës arsimorë, të cilët marrin 18 milionë dollarë nga 100 milionëshi i përgjithshëm. Ndërkohë ministrja e tha dhe unë po e rithem: Në sistemin universitar nuk është prekur rroga që nga viti 2005.Një gjë e pakonceptueshme! Janë 5 milionë dollarë në këtë shumë që shkojnë për rritje pagash në sistemin universitar publik. Një rritje pagash në total, e cila po të shikoni gjithë ecurinë e pagës suaj është më e larta e të gjitha kohëve”, – sqaroi kryeministri Rama në takimin me mësuesit. Më tej ai theksoi se: “Ne duam që në radhë të parë, policët, mësuesit, mjekët dhe infermierët të kenë pagat më të mira në rajon.

Ky është objektivi ynë dhe jemi me këtë rritje pranë këtij objektivi. Janë tri figura pa të cilët s’ka shtet”.Pagat e mësuesve do të rriten me minimumi 3 mijë lekë të reja. Paga mesatare e mësuesve, nga 53 mijë lekë, do të bëhet 58.300 lekë. Kështu, pritet që duke filluar nga marsi i 2017–ës, paga mesatare në arsimin bazë, nga 54 mijë lekë, do bëhet 59 mijë lekë, ndërsa paga mesatare e mësuesve në arsimin e mesëm, nga 60 mijë, të bëhet 66 mijë lekë. Më të ulëta janë pagat e mësuesve në ciklin e ulët, të cilat, nga 32 mijë pritet të bëhen 35.200 lekë.

 34.630 mësues do të përfitojnë rritje pagash me 10%.
 Fondi parashikohet të jetë 1.8 miliardë lekë.
 Sistemi parauniversitar, rritje page 10%
 31.730 mësues, kostoja financiare për vitin 2017, 1.3 miliardë lekë
 Rritje page 10 për qind për sistemin arsimor universitar publik
 Përfitojnë 3.260 punonjës, kostoja për buxhetin, 500 milionë lekë