Kryeministri Edi Rama i është drejtuar me një thirrje Gjykatës Kushtetuese lidhur me rrogat e gjyqtarëve, duke kërkuar që ky institucion të mos i lërë një njollë të madhe turpi Shqipërisë.
“Unë shpresoj shumë që Gjykata Kushtetuese të mos ia lërë këtë njollë të madhe turpi Shqipërisë dhe të mos na detyrojë të kërkojmë ilaçe të tjera”, tha kreu i qeverisë përmes një video-mesazhi në rrjetet sociale.
Më herët Rama vuri në dukje se nisma për rritjen e rrogave të gjyqtarëve do t’i kushtonte buxhetit të shtetit 37 milionë euro, para që vijnë nga taksat e qytetarëve shqiptarë.
Rama hodhi poshtë logjikën që kjo diferencë në rritjen e pretenduar të pagave të gjyqtarëve do të mbulohet nga ajo që gjyqtarët i kthejnë buxhetit të shtetit.
Kreu i qeverisë tha se me këtë logjikë edhe tatimorët duhet të kërkojnë rritje pagash, policia t’i marrë gjobat për vete.
“Po me mësuesit dhe pensionistët si i bëhet?!”, shtroi pyetjen kreu i qeverisë, duke theksuar se ka shumë njerëz që s’prodhojnë të ardhura të drejtpërdrejta, por prodhojnë të tjera gjëra në të mirë të shoqërisë.
