Kryeministri Edi Rama zhvilloi sot më 14 nëntor, një bashkëbisedim me banorët e Njësisë 2 në Tiranë, ku foli për planet e qeverisë për rritjen e pagave, mbështetjen e biznesit dhe investimet në sektorët kyç.
Ai siguroi se “paga minimale do të shkojë 500 euro në 2026” dhe se pagat do të rriten jo vetëm në sektorin publik, por edhe në atë privat.
Rama foli për krijimin e një sistemi të qëndrueshëm fiskal për bizneset, duke shpjeguar se “do iu ofrohet mundësia kompanive që të merren vesh me administratën tatimore, për të rënë dakord për tatimin që do të paguajnë mbi fitimin”.
Sipas tij, kjo do t’u lejojë bizneseve të operojnë qetësisht, pa u shqetësuar për kontrolle të shpeshta apo ngarkesa burokratike, ndërsa qeveria do të ketë stabilitet në mbledhjen e të ardhurave, që përcaktojnë rritjen e ekonomisë.
Ai theksoi se nuk ka plane për rritje të taksave, duke siguruar qytetarët.
“Nuk do të rritet asnjë taksë”, tha ai. Për më tepër, Rama garantoi se investimet do të rriten në sektorët e infrastrukturës, shëndetësisë dhe arsimit, duke përmirësuar jetën e qytetarëve dhe duke krijuar mundësi të reja zhvillimi për komunitetin. “Qeveria do të jetë pranë qytetarëve dhe bizneseve, duke siguruar stabilitet dhe rritje ekonomike”, përfundoi Rama.
