Këshilli i Ministrave ka miratuar ndryshime thelbësore në skemën e pagave për personelin shqiptar që shërben në misione ndërkombëtare. Vendimi i ri fut për herë të parë në këtë strukturë hetuesit e Byrosë Kombëtare të Hetimit (BKH) dhe punonjësit e Agjencisë së Inteligjencës Financiare (AIF).
Hetuesit e BKH-së në Hagë dhe Bukuresht
Sipas vendimit, hetuesit e BKH-së që do të shërbejnë si oficerë ndërlidhës pranë EUROPOL (Hagë) ose SELEC (Qendra për Zbatimin e Ligjit në Evropën Juglindore, Bukuresht) do të përfitojnë një trajtim financiar specifik.
Ata do të ruajnë pagën bruto që kishin si hetues në momentin e emërimit. Përveç pagës, qeveria u ka miratuar një shtesë mujore për koston e jetesës: 280 Euro në muaj për ata në EUROPOL dhe 180 Euro në muaj për ata në SELEC.
Lufta kundër pastrimit të parave
Ndryshimet përfshijnë edhe punonjësit e Agjencisë së Inteligjencës Financiare. Ata që do të shërbejnë si “nëpunës të sekonduar” (të huazuar) në pozicionin e menaxherit të projektit pranë Komitetit Moneyval në Strasburg, do të trajtohen gjithashtu me këtë VKM.
Indeksimi i diplomatëve
Përveç shtesave të reja, vendimi parashikon edhe rritjen e pagave për trupin diplomatik dhe ushtarak ekzistues jashtë vendit. Të gjitha elementet e pagave për këto kategori janë indeksuar me 2.5%, si pjesë e politikës buxhetore të vitit 2026.
Efektet financiare për indeksimin fillojnë nga 1 Janari 2026, ndërsa për emërimet e reja të BKH dhe AIF nisin nga momenti i marrëses së detyrës.
